Zhvillimet në Lindjen e Mesme kanë qenë të ethshme që nga orët e para të së shtunës, pas pushtimit të territoreve izraelite nga Hamasi dhe vendimit të qeverisë Netanyahu për të shpallur gjendjen e luftës dhe për të rimarrë kontrollin e rajonit.
Sulmet ajrore në territorin libanez u njoftuan nga Forcat e Armatosura izraelite, pa dhënë detaje të mëtejshme, në një kohë kur që nga mëngjesi i së hënës, në Izrael dhe Gaza vijojnë bombardimet nga të dyja palët, ku në qendër, për fat të keq, janë civilët.
Pas sulmeve ajrore izraelite në Gaza dhe nivelimit të ndërtesave, ushtria e vendit njoftoi se kishte dislokuar forca kundër një infiltrimi të dyshuar nga Libani, i cili, sipas një radiostacioni lokal, u regjistrua në kufirin verior.
“U mor një raport në lidhje me infiltrimin e një numri të dyshuarish në territorin izraelit nga territori libanez. Ushtarët e IDF janë vendosur në zonë”, tha ushtria në një deklaratë, siç raportohet nga Reuters. Në të njëjtën kohë, sipas radios publike izraelite, ka pasur një shkëmbim zjarri mes forcave izraelite dhe njerëzve që duket se kanë shkatërruar një gardh dhe kanë kaluar kufirin nga Libani. Në fakt, dy persona të armatosur thuhet se janë vrarë nga zjarri i IDF-së, ndërsa ushtria izraelite ka ngritur edhe helikopterë, të cilët fshijnë zonën dhe sulmojnë objektivat.
Në të njëjtën kohë, ushtria izraelite njoftoi se dy predha u hodhën nga Libani në territorin e vendit, pa viktima të regjistruara.
Banorët e Maalot, një qytet në Izraelin verior, u udhëzuan të qëndrojnë në shtëpitë e tyre.
Me rastin e përleshjeve në veri të Izraelit, Hezbollahu sqaroi në deklaratën e tij se “ne nuk kemi kryer asnjë operacion depërtimi në territorin izraelit”.
Prioriteti është stabiliteti në kufirin me Izraelin, tha kryeministri i Libanit
E ndërsa e gjithë kjo po ndodhte në kufirin verior të Izraelit, kryeministri i qeverisë tranzitore të Libanit, Najib Mikati, tha se prioriteti kryesor i vendit të tij tani është ruajtja e stabilitetit në rajon.
Mikati, në fakt, i bëri thirrje komunitetit ndërkombëtar që të “marr përgjegjësi” dhe të ushtrojë presion ndaj Izraelit për t’u kthyer në bisedimet e paqes në kuadër të iniciativës arabe të paqes. “Çdo gjë tjetër që përkeqëson ciklin e dhunës nuk do t’i bëjë askujt mirë,” tha ai.
Hezbollahu premtoi se nuk do të përfshihej në luftë
Në të njëjtin kontekst, ministri i Jashtëm i Libanit zbuloi premtimin e Hezbollahut drejtuar qeverisë së vendit, se nuk do të ndërhyjë në luftime.
Ministri, Abdullah Ebu Habib, i bëri komentet për gazetën arabe Al-Sharq al-Awast të shtunën, përpara se Hezbollahu të njoftonte se kishte sulmuar pozicionet izraelite në malin Dov.
