Dhuna e bandave që godet Haitin ka çuar në një rritje prej 30% të kequshqyerjes së fëmijëve në një vit, sipas vlerësimeve të Unicef, i cili paralajmëron se jetët e më shumë se 100,000 fëmijëve në atë vend janë në rrezik.
“Dhuna e armatosur ka rritur numrin e fëmijëve që janë të kequshqyer rëndë, një gjendje e quajtur dehidratim akut, i cili është rritur me 30% krahasuar me vitin 2022”, tha kjo agjenci e OKB-së.
Unicef vlerëson se 115,600 fëmijë do të vuajnë nga kjo formë vdekjeprurëse e kequshqyerjes këtë vit, një nga kërcënimet më serioze për mbijetesën e tyre. Vitin e kaluar ky numër u vlerësua në 87,500.
“Në Haiti, gjithnjë e më shumë nëna dhe baballarë nuk kanë më mjete për të siguruar kujdesin dhe ushqimin e duhur për fëmijët e tyre dhe prindërit nuk mund t’i çojnë ata në qendrat shëndetësore sepse dhuna e grupeve të armatosura është rritur jashtëzakonisht,” tha kreu i Unicef në atë vend, Bruno Maes.
“E kombinuar me epideminë e kolerës, gjithnjë e më shumë fëmijë do të vuajnë nga dehidratimi i rëndë dhe do të vdesin nëse nuk merren masa urgjente”, theksoi ai.
Kolera u rishfaq në Haiti tetorin e kaluar dhe që atëherë janë regjistruar më shumë se 41,000 raste të dyshuara. Pothuajse gjysma përfshinte fëmijë nën moshën 14 vjeç.
Në këto rrethana, Unicef-it “i duhen urgjentisht” 17 milionë dollarë për të identifikuar rastet e kequshqyerjes së rëndë dhe për t’u ofruar fëmijëve kujdesin dhe ushqimin që u nevojitet. Mungesa e fondeve mund të rrezikojë jetën e më shumë se 100,000 fëmijëve, tha agjencia, duke vënë në dukje se fëmijët që jetojnë në kryeqytet, Port-au-Prince, janë më të rrezikuarit.
Gati një në katër fëmijë në Haiti vuan nga kequshqyerja kronike, një gjendje që ka pasoja afatgjata në zhvillimin e tyre fizik dhe mendor.
Më shumë se 600 njerëz u vranë në periferi të Port-au-Prince gjatë prillit në një valë të re të “dhunës ekstreme”, sipas OKB-së, e cila po bën presion për një forcë ndërkombëtare për të ndihmuar policinë lokale për të luftuar bandat. /abcnews.al
