Vedat Muriqi do të luajë në Seria A këtë sezon, pasi nënshkroi më Lazion që pagoi jo pak për transferimin e tij nga Fenerbahce. Igli Tare, drejtori sportiv i klubi italian, pranon se nuk ishte e lehtë për ta bërë tyrin sulmuesin dardan, autor të 15 golave në kampionatin turk vjet.
“Nuk fshihem, është kënaqësi të prezantoj Muriqin. Negociata për ta marrë atë ishin të lodhshme dhe të gjata, por jemi të lumtur që e kemi këtu. Ai i shtohet një reparti shumë të fortë që ka emra si Immobile, Correa e Caicedo. Vedati e plotëson këtë repart. Luajmë në tre kompeticione dhe është e rëndësishme t’i kemi të gjithë”, tha Tare, i cili la fjalën Muriqit më pas.
NOFKA IBRAHIMOVIC – “Së pari është një nder të jem këtu dhe do të bëj më të mirën time për të ndihmuar Lazion. Sa i takon nofkës Ibra i Kosovës, u them se do të jem Muriqi i Lazios dhe jo Ibra i Lazios”, tha fillimisht sulmuesi.
OBJEKTIVAT – “Sigurisht Serie A është ndryshe nga kampionati në Turqi dhe objektivi im i parë është të ndihmoj skuadrën për të realizuar qëllimet e vëna nga klubi. Kur erdha mora shumë mesazhe nga tifozët dhe u kam garantuar se do të bëj maksimumin tim.
Nuk dua të kem shumë presion për golat, edhe pse kjo më ndihmon për të arritur suksese. Jam një lojtar që më pëlqen të përfshihem në lojën e skuadrës, nuk jam individualist”, shtoi Muriqi gjatë konferencës së shtypit ditën e sotme.
TRANSFERIMI – “Unë jam në një nga klubet më të mëdha në Itali, Lazio është ekipi i parë në Roma. Dua të jem po aq i madh sa ky klub. Kisha shumë oferta, por zgjodha Lazion për mënyrën se si luan dhe prej drejtorit sportiv Tarë, i cili është shqiptar”, deklaron sulmuesi.
IMMOBILE DHE DERBI – “Është një ëndërr të luaj me Immobile. Do të bëj gjithçka që është e mundur për të mësuar prej tij dhe për ta mbështetur atë brenda dhe jashtë fushës. Derbi? Sigurisht që kam informacion mbi derbin e Romës dhe mezi pres që ta luaj atë”, përfundon Muriqi. /abcnews.al
