Ukraina dhe BE-ja kanë diskutuar marrjen e “masave të menjëhershme për të zhbllokuar portet e Ukrainës për eksportimin e grurit” pasi bllokada e porteve të Ukrainës në Detin e Zi i ka detyruar eksportuesit e drithit të kërkojnë alternativa të tjera, sipas BBC.
Presidenti ukrainas Volodymyr Zelensky tha se ai diskutoi parandalimin e “një krize globale ushqimore të shkaktuar nga veprimet agresive të Rusisë” gjatë bisedimeve me presidentin e Këshillit Europian Charles Michel në vizitën e tij në Odesa të hënën.
Përpara se të fillonte lufta, Ukraina eksportonte 4.5 milionë tonë prodhime bujqësore në muaj përmes porteve të saj – 12% të grurit në botë, 15% të misrit dhe 50% të vajit të lulediellit, raporton agjencia e lajmeve AFP.
Por pushtimi ka dëmtuar kapacitetin e saj të eksportit, me Rusinë që shkatërroi infrastrukturën e transportit dhe bllokoi Odesën, portin kryesor për eksportet e grurit.
“Në portin e Odesa, pashë kapanone plot me drithë, grurë dhe misër gati për eksport,” tha Michel.
“Ky ushqim shumë i nevojshëm është bllokuar për shkak të luftës ruse dhe bllokadës së porteve të Detit të Zi duke shkaktuar pasoja dramatike për vendet e cenueshme. Ne kemi nevojë për një përgjigje globale,” shtoi ai.
/abcnews.al
