Loading ...
Ayatollah Ali Khamenei është lideri suprem i Iran dhe një nga udhëheqësit më jetëgjatë në Lindjen e Mesme, duke mbajtur këtë post prej vitit 1989. Ai mori drejtimin pas vdekjes së Ruhollah Khomeini dhe ka konsoliduar kontroll pothuajse absolut mbi institucionet kryesore të vendit gjatë rreth 37 viteve në pushtet.
Khamenei ka ushtruar ndikim që prej Revolucionit Islamik të vitit 1979. Ai ka shërbyer si ministër i Mbrojtjes dhe më pas ka mbikëqyrur Gardën Revolucionare Islamike, përpara se të zgjidhej president në vitin 1981. Para zgjedhjes së tij si president, ai i mbijetoi një atentati që i paralizoi krahun e djathtë.
Si lider suprem, ai komandon forcat e armatosura, përfshirë Gardën Revolucionare, mbikëqyr sistemin gjyqësor, kontrollon këshillin që verifikon kandidatët zgjedhorë dhe ka ndikim vendimtar mbi median shtetërore dhe politikat strategjike, përfshirë programin bërthamor dhe të ardhurat nga rezervat e mëdha të naftës.
Gjatë sundimit të tij, Khamenei është përballur me protesta të shumta, të cilat janë shtypur me forcë. Në vitin 1999 ai goditi demonstratat studentore, ndërsa në vitin 2009 ndërhyri ndaj protestave pas zgjedhjeve presidenciale të kontestuara. Në vitin 2022, autoritetet iraniane shtypën protestat e nisura pas vdekjes së Mahsa Amini, e arrestuar për shkelje të pretenduar të rregullave të mbulesës. Raportime të ndryshme flasin për mijëra viktima gjatë protestave të viteve të fundit, megjithëse shifrat e sakta mbeten të paqarta. Në disa raste, regjimi ka ndërprerë internetin për të kufizuar komunikimin dhe vëmendjen ndërkombëtare.
Në politikën e jashtme, Khamenei ka vendosur kundërshtimin ndaj SHBA-së dhe Izraelit në qendër të strategjisë së tij. Ai mbështet të ashtuquajturin “boshti i rezistencës” në rajon dhe ka paralajmëruar se çdo luftë me SHBA-në do të shndërrohej në konflikt rajonal. Pas sulmeve amerikane ndaj objekteve bërthamore iraniane vitin e kaluar, Irani lëshoi raketa drejt një baze ushtarake amerikane në Katar, pa raportime për viktima.
Tashmë 86 vjeç, Khamenei ka përmendur edhe emra të mundshëm si pasues, ndërsa roli i tij mbetet thelbësor në çdo zhvillim të madh politik apo ushtarak që lidhet me Iranin.
Sakaq, prej ditës së sotme Izraeli dhe SHBA sulmuan me raketa Iranin duke sjellë tensione në Lindjen e Mesme. Irani iu kundërpërgjigj me një sërë raketash që prekën edhe vende si Katar, Bahrain, Dubai dhe Kuvajt. Zyrtarë izraelit dolën gjatë mbrëmjes me deklarata se Lideri Suprem i Iranit është vrarë nga sulmet amerikano-izraelite, një lajm i cili nuk ëhstë konfirmuar ende nga Irani zyrtar. / abcnews.al /
