U zhvillua ditën e sotme në stadiumin “Selman Stërmasi” finalja e madhe e kampionatit kombëtar për grupmoshën 17 vjeçare, midis Shënkollit dhe Vllaznisë, ndeshje e cila përfundoi me rezultatin 1-0 për Shënkollin, të cilët shënuan në minutën e 77-të me anë të numrit 9-të Ensar Shimaj duke u shpallur kampion të Shqipërisë.
Finalja dhuroi një ndeshje të barabartë me të dy skuadrat që ishin shumë të kujdesshme, duke mos u hedhur në sulm. Gjithçka u vendos nga goli i Shimajt që i dhuroi Shënkollit trofeun e parë kombëtar. Ndeshja u ndoq edhe nga stafet e ekipeve kombëtare, të cilët kanë parë nga afër elementët më cilësorë të të dy skuadrave.
Në ceremoninë e zhvilluar në përfundim të finales, zëvendëspresidenti i FSHF, Lutfi Nuriu, i dorëzoi medaljet dhe trofeun lojtarëve të Shënkollit. Skuadrat zbritën në fushën e lojës me këto formacione:
Shënkolli: Simoni; Prendi; Rrapi; Macaj; Shimaj; Ndoj; Vuksani; Kaceli; Lekaj; Gjoka; Cuni.
Vllaznia: Kacaj; Qerpiku; Mataj; Mujaxhi; Papaj; Selmani; Kodra; Spahija; Perloshaj; Delaj; Alivoda. /fshf.org
