Një grua afgane pasi u evakuua nga Kabuli, lindi në një avion ushtarak amerikan, sipas një deklaratë të forcave ajrore të SHBA-së .
”Gruaja lindi menjëherë pas uljes në bazën amerikane të Ramsteinit, në Gjermani”, shtoi komanda. Avioni po fluturonte nga një bazë në Lindjen e Mesme në atë të Ramsteinit, kur gruas i filluan dhimbjet e lindjes.
”Piloti uli lartësinë për të rritur presionin e ajrit në bord dhe kjo ndihmoi në stabilizimin dhe shpëtimin e jetës së nënës”, tha komanda amerikane.
Menjëherë pas uljes, trupat amerikane ndihmuan gruan afgane të lindte fëmijën e saj në bord, para se gruaja të transportohej me të porsalindurin në një spital aty pranë.
Nëna dhe vogëlushja ndodhen në gjendje të mirë shëndetësore./abcnews.al
