Nga Ermal Vija
Inspektori i komisariatit numër 6 në Tiranë, i arrestuar një ditë më parë për korrupsion akuzohet se mori 2 mijë euro duke lejuar ndërtime te paligjshme në zonën e kombinatit.
Burime pranë shërbimit për çështjet e brendshme dhe ankesat që vunë në pranga 47-vjeçarin Levzat Veselaj, i thane ABC se, inspektori është kallëzuar nga një punonjës I bashkisë së Tiranës, që ka konstatuar ndërtimin pa lejë.
Nga veprimet hetimore ka rezultuar se Veselaj në këmbim të parave ka ndihmuar një person që të vazhdojë punimet ne objektin e tij, madje duke I garantuar që efektivët e komisariatit 6 nuk do ta pengonin.
Hetuesit po kryejnë veprime të tjera hetimore për të mësuar nëse inspektori ka pasur bashkëpunëtorë të tjerë nga radhët e policisë në këtë veprimtari te paligjshme.
47-vjeçari Levzat Vesalaj do të përballet me akuzën e shpërdorimit të detyrës dhe korrupsionit pasiv. Ky është rasti i dytë ne pak dite që efektivë te policisë përfundojnë në pranga, pas operacioneve të zhvilluara nga SHÇBA. Disa ditë më parë, u arrestua efektivi I forcave të repartit special RENEA, Real Luli, I dyshuar për përfshirje në trafikun e kokainës në disa zona të kryeqytetit./Abcnews.al
