Chelsea po kalon një moment shumë të mirë dhe ka grumbulluar 13 pikë në pesë ndeshjet e fundit në Premier League. Nesër i pret një transfertë e vështirë përballë Southampton dhe trajneri Thomas Tuchel prek disa tema gjatë konferencës për shtypin.
“Thiago Silva nuk do të luajë nesër, nuk është akoma gati. Me shumë mundësi do të rikthehen Havertz dhe Abraham. I vetmi lojtar që është në dyshim është Pulisic. Nuk i shqetësuar për dëmtimet e tij të shumta.
Chelsea e bleu për potencialin dhe kualitetin që ka, ndërkohë që Christian ka treguar se i ka të gjithë kartat në rregull për të qenë titullar i ekipit. Dje ndjeu një shqetësim në pulpë dhe e la stërvitjen në mes, pasi nuk donim të rrezikonim.
Ai duhet të qëndrojë gjithmonë pozitiv, është një lojtar që jep kontributin e tij nëse luan si titullar por edhe nëse futet gjatë ndeshjes. Chelsea? Po fitojmë besim, edhe ndaj Tottenham luajtëm futbollin tonë, luajtëm me kurajo të madhe.
Ky është objektivi ynë, duhet të shprehemi gjithmonë në të njëjtën mënyrë, pavarësisht kundërshtarit që kemi përballë. Jemi gati për Southampton, duam t’i japim vazhdimësi rezultateve pozitive“, deklaron trajneri gjerman. /abcnews.al
