Thomas Tuchel e nisi me një barazim 0-0 aventurën në stolin e Chelsea. Ekipi londinez nuk mori më shumë se një pikë përballë Wolves në “Stamford Bridge” dhe renditet në vend të tetë në kampionat me 30 pikë, 11 më pak se City kryesues.
Chelsea dominoi në qarkullimin e topit dhe krijoi disa raste për gol, por pa ia dalë të çajë mbrojtjen mike. Trajneri gjerman foli pas takimit ndaj “Ujqve”, duke u ndalur te gara për titullin kampion, aty ku Chelsea nuk bën pjesë për momentin.
“Duhet të jemi realistë, titulli kampion është larg për ne. Kur firmos për një klub si Chelsea, të gjithë presin që të luftosh për fitimin e Premier League, por jemi shumë pika larg kreut dhe kemi disa skuadra sipër nesh në renditje.
Gjithsesi, jam shumë i sigurt që me punë do të rikthehemi te rezultatet pozitive. Kam gjetur një grup shumë të mirë lojtarësh, të gjithë janë vënë në dispozicionin tim“, deklaroi trajneri gjerman i “Bluve të Londrës”. /abcnews.al
