PSG ka disa lojtarë të cilëve u përfundon kontrata në datë 30 qershor. Thomas Tuchel ka folur për ta në konferencën për shtyp. Edinson Cavani, Thomas Meunier (u zyrtarizua dje si lojtar i Dortmund) dhe Tanguy Kouassi nuk do të jenë pjesë e skuadrës në Champions League, që rifillon në muajin gusht.
Në vit të fundit të kontratës është edhe Thiago Silva, por mbrojtësi brazilian ka vendosur të jetë pjesë e PSG edhe në kompeticionin më të rëndësishëm për klube, aty ku skuadra franceze është kualifikuar në çerekfinale.
“Gjërat nuk janë të thjeshta dhe po kalojmë një situatë të çuditshme. Do të na mungojnë shumë këta lojtarë në Champions League. Jo vetëm Edi (Cavani), por edhe Thomas dhe Kouassi. Kishim një grup shumë të fortë, shumë të lidhur me njëri-tjetrin. Duhet ta mbyllim Champions pa disa nga lojtarët kryesorë.
Është e trishtë dhe e çuditshme. Thiago Silva? Është një profesionist i madh dhe do të mbetet kapiteni ynë deri në fund të sezonit. Thiago nuk është një futbollist normal dhe ne do ta shijojmë deri në fund. Kemi një raport shumë të mirë dhe ai është një lojtar kyç për ne.
Është super i besueshëm, profesionist puro dhe një kapiten i vërtetë. Jam shumë i lumtur që do të qëndrojë edhe dy muaj me ne“, deklaron trajneri gjerman i kampionëve të Francës. /abcnews.al
