Presidenti amerikan Donald Trump ka udhëzuar Pentagonin për tërheqjen e 9.500 ushtarëve amerikanë me detyrë të përhershme në Gjermani.
Në lajmin e gazetës amerikane Wall Street Journal të bazuar në burimet brenda Shtëpisë së Bardhë, në urdhëresën e nënshkruar nga këshilltari i Sigurisë Kombëtare të Shtëpisë së Bardhë, Robert O’Brien, është urdhëruar që limiti i numrit të ushtarëve amerikanë në Gjermani të ulet në 25.000.
Me këtë urdhër, nga Gjermania ku shërbejnë 34.500 ushtarë amerikanë, do të tërhiqen 9.500 ushtarë.
Sipas planifikimit aktual të SHBA-së, në Gjermani mund të vendosen deri në 52.000 ushtarë.
“Arsyeja që ne kemi trupa jashtë shtetit në Gjermani nuk është për të mbrojtur gjermanët, gjithçka që ne kemi është për përfitimin tonë,” tha Frederick B. Hodges, një gjeneral toger në pension dhe një ish-komandant i lartë i ushtrisë amerikane në Europë.
Shtetet e Bashkuara aktualisht kanë më shumë trupa në Gjermani sesa në çdo vend tjetër përveç Japonisë. Prania Amerikane atje është një trashëgimi e Luftës së Dytë Botërore, dhe u bë një gur themeli i mbrojtjes ndaj Luftës së Ftohtë të vendit kundër Bashkimit Sovjetik.
Tërheqja e trupave do të mirëpritet në Moskë si një shenjë tjetër e ndarjes në aleancën e Atlantikut dhe e cila zbeh interesin e Amerikës për udhëheqjen globale.
Në vend që të shpenzojë për të mbrojtur veten dhe Europën, zoti Trump ka argumentuar, se Gjermania në vend të kësaj ndërtoi një sistem të lavdishëm të mirëqenies sociale.
Gjermania shpenzoi rreth 1.36 përqind të produktit të saj të brendshëm bruto në ushtrinë e saj në vitin 2019, një numër që është rritur por është akoma i pakët nga objektivi i deklaruar i Organizatës së Traktatit të Atlantikut të Veriut prej 2 përqind. Për shkak të ekonomisë së saj të madhe, Gjermania tani harxhon më shumë në ushtrinë e saj sesa fuqitë e tjera europiane .
Gushtin e kaluar, Richard Grenell, asokohe ambasadori amerikan në Gjermani, sugjeroi se nuk kishte kuptim që Gjermania, të mbështetet në trupat amerikane për mbrojtje.
Trump ka pasur marrëdhënie të ftohta me kancelaren Angela Merkel , dhe mosmarrëveshje të gjera për çështje si ndryshimi i klimës dhe tubacionet e gazit natyror të Gjermanisë me Rusinë.
“Ajo që Trump kurrë nuk do ta kuptojë është se ky veprim nuk do të dëmtojë aspak Merkelin,” tha Julianne Smith, një ish zyrtare e administratës së Obamës tani me Fondin Gjerman Marshall të Shteteve të Bashkuara. “Nëse ai shpreson ta dëmtojë atë politikisht, nuk ka për të arritur asgjë. /abcnews.al
