Loading ...
Presidenti amerikan Donald Trump ka propozuar uljen e tarifave tregtare kundër Kinës në nivelin 80%, vetëm pak orë përpara fillimit të bisedimeve të rëndësishme mes dy vendeve në Gjenevë, Zvicër. Ky zhvillim vjen në një përpjekje për të zbutur luftën tregtare që ka ndikuar ndjeshëm në ekonominë globale.
Takimi i pritshëm do të përfshijë zyrtarë të lartë nga të dyja palët dhe shihet si një mundësi për të zgjidhur një nga konfliktet më të ashpra tregtare të dekadës së fundit. Bisedimet do të udhëhiqen nga sekretari amerikan i Thesarit, Scott Bessent, të cilit i është lënë vendimi përfundimtar për reduktimin e tarifave.
Në një postim në platformën e tij Truth Social, Trump deklaroi: “Tarifë 80% për Kinën duket e drejtë! Varet nga Scott B.”
Aktualisht, tarifat mes dy vendeve janë në nivele shumë të larta 125% për mallrat amerikane që eksportohen në Kinë dhe 145% për mallrat kineze që hyjnë në SHBA çka konsiderohet praktikisht si një embargo tregtare.
Kjo lëvizje e papritur ka sjellë reagime të menjëhershme në tregjet financiare, me bursat ndërkombëtare që janë rritur në pritje të një përmirësimi të marrëdhënieve tregtare mes dy ekonomive më të mëdha në botë.
Ndërkohë, të dy vendet po përballen me pasojat ekonomike të luftës tregtare. Ekonomia amerikane është tkurrur në tremujorin e parë të vitit, ndërsa Kina ka ndërmarrë masa lehtësuese monetare, përfshirë uljen e normave të interesit dhe të rezervave të detyrueshme për bankat.
Delegacioni kinez në Gjenevë do të drejtohet nga zëvendëskryeministri He Lifeng, i njohur ndërkombëtarisht si një negociator i aftë. Pekini ka sinjalizuar se pret që Uashingtoni të bëjë hapin e parë drejt një kompromisi.
Tensionet tregtare SHBA-Kinë kanë zgjatur për më shumë se një dekadë, me ndikime të mëdha në inflacion, furnizime dhe rritje ekonomike në mbarë botën. Bisedimet në Zvicër shihen si një mundësi vendimtare për të shmangur përshkallëzime të mëtejshme. / abcnews.al
