Loading ...Urdhri i Donald Trump për dëbimin e emigrantëve të palgjishëm nga Shtetet e Bashkuara prek edhe 1 mijë e 875 shqiptarë.
Sipas një dokumenti të Drejtorisë së Emigracionit dhe Doganave, të publikuar nga Fox News, shqiptarët në fjalë janë pjesë e 1.4 milionë emigrantëve që pritet të dëbohen.
Dokumenti pasqyron të dhëna nga nëntori i vitit 2024, të cilat thuhet se do të gjejnë zbatim edhe gjatë fushatës anti-emigracion të presidentit Trump.
1874 shqiptarët në listë janë aktualisht në dosjen e personave që nuk janë në paraburgimet e Drejtorisë së Emigracionit me urdhra përfundimtarë të largimit, duke e vendosur Shqipërinë midis vendeve të rangut të mesëm të prekur nga dëbimet e mundshme.
Nga 1.4 milionë emigrantë të paligjshëm në SHBA një pjesë e madhe janë nga Honduras, Guatemala, Meksika dhe El Salvador.
Sapo mori detyrën Donald Trump paralajmëroi se do të rrisë dëbimet masive. Ai njoftoi se administrata e tij planifikon të largojë nga vendi “kriminelët e huaj” në një qendër paraburgimi në Gjirin e Guantanamos, ku pritet që të ndërtohet një qendër për emigrantët me kapacitet deri 30 mijë persona.
Po ashtu Trump ka dhënë urdhër për dërgimin e ushtrisë në kufi me Meksikën dhe ka paralajmëruar vendin e Amerikës Qendrore se do të vendosë tarifa 25%, nëse nuk punon për të menaxhuar çështjen e emigrantëve.
