Gjykata Europiane e të Drejtave të Njeriut në Strasburg ka dënuar Italinë për ndalimin dhe mbajtjen e 4 emigrantëve të mitur ganezë në kushte çnjerëzore në zonën e Tarantos për gati dy muaj në vitin 2017.
Gjykata vendosi gjithashtu që Italia duhet t’u paguajë atyre 6500 euro për dëmet morale, plus 4000 euro për shpenzimet ligjore. Të miturit nga Gana kishin lindur në vitin 2000 dhe kishin mbërritur në bregdetin italian më 22 maj 2017 duke deklaruar se ishin të mitur.
Megjithatë, ata u dërguan në Taranto, e rezervuar vetëm për të rritur, ku qëndruan deri në mes të korrikut, kur, pas një ndërhyrjeje nga Gjykata e Strasburgut, u transferuan në një mjedis për të mitur.
Duke dënuar Italinë për kushtet në të cilat ata jetonin në Taranto, Gjykata u bazua në provat e ofruara nga të katërt, duke përfshirë fotografitë që tregojnë mbipopullimin e qendrës, e krijuar për të akomoduar 400 njerëz, por që në atë kohë mbante 1,419 dhe kushtet e papërshtatshme të higjienës.
Vendimi thekson se qeveria italiane nuk i kundërshtoi këto të dhëna, por shpjegoi se në datat 22 dhe 26 maj 2017, dy grupe shumë të mëdha emigrantësh kishin mbërritur, duke përfshirë 202 të mitur, dhe se këto ardhje masive e kishin bërë situatën veçanërisht të vështirë për t’u menaxhuar.
/abcnews.al
