Sipas ligjeve në fuqi në Iran, është bashkëshorti ai që vendos nëse bashkëshortja e tij mund të udhëtojë jashtë vendit. Në këtë mënyrë trajnerja e ekipit femëror të skive nuk ka mundur të shoqërojë atletet e ekipit të saj në kampionatin botëror që zhvillohet në Itali, pasi bashkëshorti i saj nuk e ka lejuar.
Samira Zargari, trajnerja e skuadrës femërore iraniane të skive, nuk ka mundur të shoqërojë atletet e saj në kampionatin botëror në Kortina të Italisë. Kjo sepse bashkëshorti i saj e ka ndaluar të largohet nga vendi, duke qenë se një vendim i tillë i lejohet nga ligjet në fuqi në republikën islamike. Ngjarja është kthyer në një çështje, madje dhe zyrtarët e lartë të federatës iraniane u përpoqën t’i ndryshojnë mendjen bashkëshortit të saj.
Sipas ligjeve në fuqi në Iran, gratë duhet të kenë lejen e bashkëshortëve të tyre për të pasur një pasaportë. Por dhe nëse kanë dokumentet e duhura, bashkëshortët mund t’i ndalojnë të udhëtojnë.
This is happening in the 21st century!
Samira Zargari, Head coach of Iran's ski team, wasn't allowed to accompany her team to the tournament in Italy. You know why?
Her husband didn't give her permission. In Iran women need the permission of male guardians to leave the country pic.twitter.com/WL49tmc9SW
— Masih Alinejad ?️ (@AlinejadMasih) February 17, 2021
Në faqen zyrtare të federatës iraniane të skive është publikuar lista e delegacionit që është nisur për në Itali dhe në vend të trajneres është shënuar emri një anëtareje të ekipit kombëtar të skive.
Samira Zargari nuk është atletja e parë iraniane që ndalohet nga bashkëshorti për të marrë pjesë në gara ndërkombëtare. Para saj e njëjta gjë kishte ndodhur në vitin 2015, me Nilufar Ardalan, kapitene e kombëtares femërore të futbollit, dhe në vitin 2017 me Zahra Nemati, kampione në Lojërat para olimpike për hark.
Në rastin e Ardalan, ajo udhëtoi pas ndërhyrjes së gjykatës iraniane. Ligji parashikon se vetëm gjykata, në raste emergjente, mund të përmbysë vendimin e bashkëshortëve për këtë pjesë. /abcnews.al
