Tragjedi “greke” në futboll/ Vdes në moshën 31-vjeçare lojtari anglez

Athina ishte kthyer në shtëpinë e tij të dytë.

Gjithsesi, për fat të keq, kryeqyteti i Greqisë u bë edhe “arkivoli” për futbollistin anglez, Xhorxh Baldok.

Mbrojtësi 31-vjeçar u gjet i vdekur në pishinën e shtëpisë së tij në lagjen e pasur Glifadha në Athinë, diçka që ishte lajm I parë në mediat greke, dhe shkaktoi një tronditje të madhe në futbollin europian dhe atë botëror.

Për momentin, nuk dihen shkaqet e vdekjes, pra nëse ishte problem zemre, apo ndoshta mbytje, apo edhe diçka më e rëndë.

Për këtë po zhvillohen hetime, që pritet të zbulojnë arsyet e shuarjes së një lojtari kaq të ri.

Karriera e Baldokut u zhvillua kryesisht në Angli, ku lindi në 1993 në Bakingem.

Ai luajti për 7 vjet me fanelën e Shefild Junajtidit, nga 2017 deri sezonin e kaluar.

Më pas kaloi tek Panathinaikos, ku pritej të vazhdonte jetën në futboll, ndonëse nuk qe e thënë.

Me origjinë greke nga njëra prej gjysheve, Baldok përfaqësoi kombëtaren e Greqisë për 12 ndeshje.