Gjykata e Posaçme ka dënuar me 9 vite burg Jetmir Kastratin të akuzuar për trafik të lëndëve narkotike, grup i strukturuar kriminal dhe pastrim parash. Prokuroria kërkoi dënimin me 13 vite e 6 muaj burg, por për shkak se ndaj tij është zhvilluar procesi me gjykim të shkurtuar përfitoi ulje me një të tretën duke u dënuar përfundimisht me 9 vite burg. Kastrati që njihet edhe me emrin Sokol Krasniçi, rezulton se aktivitetin kriminal e ka kryer në Danimarikë, Suedi dhe Norvegji dhe për 7 vite trafikoi 1650 kilogramë kokainë.
Lëndën narkotike ai e siguronte në vendet e amerikës latine. 44-vjeçari u vu në pranga në qershor të vitit 2019-të në Danimarkë pas një operacioni të zhvilluar në atë kohë nga Europol . Sipas prokurorisë së posaçme në bashkëpunim me autoritete daneze dhe norvegjeze, ka rezultuar se Kastrati prej vitit 2012, ka investuar me paratë e siguruara nga aktiviteti kirminal në Shqipëri, kryesisht në zonën e Shkodrës dhe Velipojës në pasuri të luajtshme dhe të pa luajtshme si dhe në një biznes pularie.
Pasuritë tashmë janë konfiskuar ndërsa rezultojnë të rregjistruara në emër të të afërmëve dhe familjarave të Kastratit. Shumat e parave që siguroheshin nga trafikimi I kokainës, dërgoheshin cash nga Danimarka në Tetovë më pas në Maqedoninë e Veriut për të përfunduar në Shqipëri. Në mars të vitit 2021 gjykata e posaçme ka shpallur fajtor edhe shtetasin Dhimitër Shkodrani si personin që transportonte shumat monetare vendet nordike drej shqipërisë nga duke e dënuar me 6 vite e 8 muaj burg. Ndërsa shtetasi Astrit Beqiri, njëheresh edhe kunati i Kastratit, u dënua me 7 vite e 4 muaj pasi akuzohet se pastronte paratë e 44-vjeçarit duke investuar në pasuri të luajtshme dhe të pa luajtshme.
Njoftimi i plote:
Më datë 20.03.2023 në Gjykatën e Posaçme të Shkallës së Parë kundër Korrupsionit dhe Krimit të Organizuar Tiranë përfundoi gjykimi në lidhje me proçedimin penal nr.147/1 të vitit 2019 të regjistruar në Prokurorinë e Posaçme kundër Korrupsionit dhe Krimit të Organizuar Tiranë në ngarkim të të pandehurit Jetmir Kastrati (alias Sokol Krasnici), i akuzuar për kryerjen e veprave penale të “Pastrimit të produkteve të veprës penale ose veprimtarisë kriminale”, kryer në bashkëpunim të posaçëm, në formën e të grupit të strukturuar kriminal, parashikuar nga nenet, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”, të parashikuara nga nenet 287/1 gërmat “a”, “b” dhe “d” dhe 28/4, 333/a paragrafi 1 dhe 334 pika 1 të Kodit Penal.
Në seancat e mëparshme, nga Prokuroria e Posaçme kundër Korrupsionit dhe Krimit të Organizuar, në konkluzionet përfundimtare ishte kërkuar deklarimi fajtor i të pandehurit Jetmir Kastrati (alias Sokol Krasnici) për kryerjen e veprave penale të sipërcituara dhe dënimi i tij me 13 vjet e 6 muaj burgim.
Në aplikim të nenit 406 të Kodit të Proçedurës Penale, për shkak të gjykimit të shkurtuar, përfundimisht u kërkua dënimi i tij me 9 vjet burgim, dënim të cilin i pandehuri duhej ta vuante në burg të sigurisë së lartë.
Në përfundim të gjykimit më dt.20.03.2023 nga Gjykata e Posaçme të Shkallës së Parë kundër Korrupsionit dhe Krimit të Organizuar Tiranë, i pandehuri Jetmir Kastrati (alias Sokol Krasnici) është deklaruar fajtor për veprat penale për të cilat ai ishte akuzuar dhe është dënuar me 13 vjet e 6 muaj burgim.
Për shkak të gjykimit të shkurtuar në aplikim të nenit 406 të Kodit të Proçedurës Penale, pas uljes së 1/3 të masës së dënimit, i pandehuri Jetmir Kastrati (alias Sokol Krasnici) është dënuar përfundimisht 9 vjet burgim, dënim të cilin duhet ta vuajë në burg të sigurisë së lartë.
Që nga viti 2012 deri në Qershor 2019 i pandehuri Jetmir Kastrati (alias Sokol Krasnici), në kuadër të një grupi të strukturuar kriminal, ka trafikuar sasi shumë të mëdha kokaine në Danimarkë, Suedi dhe Norvegji, nga shitja e të cilës ka siguruar të ardhura me origjinë kriminale.
Këto të ardhura pas vitit 2012 janë shndërruar në pasuri të ndryshme të luajtshme dhe paluajtshme në Shqipëri, duke bërë në këtë mënyrë pastrimin e produkteve të veprimtarisë kriminale, nëpërmjet investimeve në pasuri të paluajtshme në zonën e Velipojës dhe qytetin e Shkodrës, si dhe aktivitete ekonomike në qytetin e Shkodrës, siç ishte një biznes pulari me emrin tregtar “RENS 2015”, pasuri apo aktivitete ekonomike këto të regjistruara në emër të të afërmëve të të pandehurit, si dhe të konfiskuara më parë në kuadër të zbatimit të Ligji nr. 10192 datë 03.12.2009 “Për Parandalimin dhe Goditjen e Krimit të Organizuar dhe Trafikimit Nëpërmjet Masave Parandaluese kundër Pasurisë”, të ndryshuar.
Zbulimi i aktivitetit kriminal, hetimi dhe gjykimi i këtij të pandehuri, në lidhje me pastrimin e produkteve të veprës penale apo veprimtarisë kriminale është bërë falë bashkëpunimit të ngushtë të Prokurorisë së Posaçme me autoritetet e drejtësisë së Danimarkës dhe Norvegjisë.
