ITALI- Një grup policësh dhe doganierësh nga Italia arritën të kapnin 148 kilogramë kokainë që fshihej në një kontejner që mbërriti në Portin e Livornos në bordin e një anijeje nga zona portuale e Guayaquil, Ekuador.
Ngarkesa e paligjshme ishte fshehur në një kontejner mallrash, i ngarkuar me banane. Sasia e lëndës narkotike shkruajnë mediat italiane mendohet se kishte për destinacion Zvicrën.
Për këtë, sipas mediave italiane, u arrestuan tre shqiptarë, të cilët tentuan të hynin në portin industrial të Livornos për të marrë lëndën narkotike.
Mediat fqinje shkruajnë se skaneri kishte zbuluar pakot e paligjshme të kokainës, e fshehur mes bananeve. Kjo sasi e drogës llogaritet të jetë më e madhja e konfiskuar ndonjëherë, në Portin e Livornos./abcnews.al
