“Toyota Yaris” shkon në gjykatë/ SPAK merr të pandehur ish prokurorin e Vlorës dhe 3 të tjerë

Prokuroria e Posaçme ka mbyllur hetimet dhe ka dërguar për gjykim dosjen ndaj ish-drejtuesit të prokurorisë së Vlorës Aurel Zarka i arrestuar me dyshimin se përmes korrupsionit ka ndikuar tek njerëzit e drejtësisë për dosjen e njohur si Toyota Yaris.

Përveç Zarkës, janë mbyllur hetimet edhe për ish-oficeren e krimeve të rënda Erjona Daupaj, avokatin Radovan Çela dhe biznesmenin Astrit Vladi.

Sipas hetimeve, këta persona në bashkëpunim me njëri-tjetrin rezultojnë të përfshirë në 8 raste të korrupsionit apo ndikimit tek njerëzit e drejtësisë për të lehtësuar pozitat penale të personave të arrestuar për kapjen e 3.4 milionë eurove në portin e Durrësit.Sipas prokurorisë, është provuar në të paktën 4 raste që Zarka ka ndërhyrë në dosjen e njohur ndryshe si Toyota Yaris. Po kështu ndërhyrje ka patur edhe për hetimin pasuror ndaj një personi të njohur të botës së krimit siç është Suel Çela për t’i hequr masën e sekuestros për disa pasuri por edhe favorizimin e një trafikanti për kultivim kanabisi, apo lehtësimin e pozitave të një shtetaseje të akuzuar për vjedhje.Mësohet se në prokurorinë e posaçme kanë mbërritur informacione nga autoritet belge që i kanë kërkuar homologëve shqiptarë identifikimin e disa personave përdorues të aplikacionit SKY. SPAK ka identifikuar një prej përdoruesve që rezultoi drejtuesi i prokurorisë së Vlorës Aurel Zarka dhe avokati Radovan Çela që mbronte disa të arrestuar për dosjen e 3.4 milionë eurove.

Në komunikimet mes Zarkës dhe avokatit Radovan Çela janë zbardhur biseda për ndërhyrje tek njerëzit e drejtësisë në lidhje me mbylljen e hetimeve për një prej fraksioneve të dosjes Toyota Yaris.

Po kështu, SPAK ka veçuar hetimet dhe po kryen verifikime mbi rolin e disa prokurorëve dhe gjyqtarëve që përmenden nga personat e pandehur se përmes korrupsionit kanë ndikuar në dosjen Toyota Yaris.