Këtë të premte kryeministri Edi Rama bëri për “ujë të ftohtë” drejtoritë e ujësjellës-kanalizimeve, duke thënë se shumica janë me humbje. Ai e konsideroi “gangrenë” të gjithë sektorin, ndërsa arriti të veçojë si shembull negativ disa bashki.
Inxhinieri Dritan Bratko i ftuar në “Radarin Inormativ” me Jonida Shehun u bashkua me kryeministrin në pikën që situata e ujësjellësve është lënë pas dore. Por ndryshe nga Rama i cili “fajësoi” kryebashkiakët, Bratko tha se problemi kryesor i investimeve të reja në ujësjellës është se kush i miraton ato. Sipas tij miratimi i projekteve duhet të bëhet nga organet kompetente që i cakton ligji. Një tjetër problem sipas inxhinierit janë burimet njerëzore në ujësjellësa, të cilët tha se janë të pakualifikuar.
“Situata e ujit është pak e lënë pas dore. Pavarësisht se janë bërë investime të rëndësishme, jemi të detyruar të sajojmë ujësjellësat pavarësisht investimeve. Vetë qytetet dhe fshatrat janë të detyruara të përshtaten me ato sisteme që kanë. Kësisoj banorët gjenden përballë një situate si në Krujë. Rasti në Krujë ka qenë sporadik mund të ndodhë kudo, por sistemi duhet të jetë më i përgatitur. Problemi kryesor i investimeve të reja në Shqipëri është kush e miraton dhe se kush thotë se ky projekt është i mirë, apo ky ujësjellës është mirë. Jo kryeministri, ministrat, por duhet ta japin ata që i cakton ligji vendimin. Duke qenë se shkon një ministër e thotë se e kam parë dhe është i mirë asgjë s’ka si t’ja mbushë mendjen kontraktorit që shkon diçka keq. Kemi ndërtuar ujësjellësa të mirë, Korça dhe Pogradeci por në tërësi jemi në situatë shumë kaotike dhe kjo ka të bëjë me burime njerëzore të kulturuar për të punuar. Kush i kualifikoi? Si u kualifikuan? Asnjë projekt që nis i ri nuk bëhet si duhet, duhet ta bëjnë brenda natës dhe pastaj në momentin që bëhet ligj për atë që e merr punën do zbatohet”.
Nëse u hiqen kompetencat bashkive mbi ujësjellësat sipas Bratkos nuk do të ndryshonte asgjë. Kjo pasi sipas tij do të jenë sërish të njëjtët punonjës, të pakualifikuar dhe të patrajnuar.
“Centralizimi s’do ndryshonte asgjë sepse përsëri të njëjët punonjës do ishin, mungojnë trajnimet dhe trajtimet. Problemet do jenë po të njëjtat, ne kemi qytete që janë të vakët në sistemin inxhinierik… etj. Rama siç bën për mjekët që i detyron të shkojnë në rrethe ashtu duhet të bëjë dhe në rastin e ujësjellësve, jo ti detyroje por ti stimuloje dhe me paga. Ne jemi shumë mbrapa me burimet njerëzore”.
Sakaq inxhinieri tha se është mundësia që ujësjellësat të dalin pa humbje.
“Ka mundësi të dalin pa humbje dhe ka mundësi shumë të mira. Te kjo puna e humbjeve, as nuk dinë të masin humbjet. E dyta është që kemi mundësi të rregullohemi, të gjitha i kemi burimet ujore”.
Ndalur te rasti i Krujës, ku u helmuan shumë qytetarë, Bratko shpjegoi si verifikohet helmimi i ujit. Një “minë me sahat” ai cilësoi edhe Tiranën.
“Bëhen analizat për vlerësimin e gjendjes së ujit sipas një ligji. Ligji i ka standardet. Bëhen matjet para se të hyjnë në linjë, pasi futen në qytetet duhet ti kesh të segmentuara për të bërë matjet. Pastaj duhet të matet edhe para se të futet në shtëpi. Pastaj bëhet dhe një raport. Dëmi më i madh është se banorët po e vuajnë këtë situatë. Kruja është një rast edhe Tirana është një minë me sahat, po bëhet një investim i madh në rrjetin unazor. Nuk është materiali i duhur ai që përdoret. Duhen materiale të certifikuara, çeliku nuk është i certifikuar. Çeliku mund të sjellë kontaminim. Duhet të kemi dhe cilësi jo vetëm volum”, tha inxhinieri.
“Qytetarët duhet të informohen te një burim i besueshëm. Ndryshe kanë për të vuajtur. Mungojnë trajnimet profesionale dhe ekonomike për punonjësit e ujësjellësit. Investimet e reja duhet të miratohen nga organet përkatëse. Në ndërtimin e ujësjellësave shumica jane të pakualifikuar”, shtoi më tej. be.k/abcnews.al
