Thirrjet ndaj njerëzve për të qëndruar në shtëpi nuk mungojnë. Koronavirusi po përhapet me një shpejtësi të frikshme dhe ka paralizuar Europën. Paniku në vendin tonë është i madh, por diçka e tillë nuk pengon shumë njerëz të thyejnë karantinën.
Tifozat Kuq e Zi kanë vendosur të marrin një nismë të bukur. Me anë të një postimi në faqen e tyre zyrtare, ultrasit e kombëtares së Shqipërisë zbulojnë idenë e tyre në lidhje me thirrjen bazë për të qëndruar në shtëpi në këto momente delikate.
“Të dashur tifoza! Tifozat Kuq e Zi do të nisin publikimin e disa prej thirrjeve tona në stadium, duke i modifikuar ato me situatën aktuale me virusin COVID-19. Le të shërbejnë këto thirrje edhe si sensibilizim shtesë i të gjithë neve duke qëndruar në shtëpitë tona, dhe respektuar thirrjet e autoriteteve. Bonu shqiptar i mirë #rrinshpi“, lexohet në statusin e TKZ. /abcnews.al
