Loading ...
Presidenti i Kosovës Hashim Thaçi në një konferencë për mediat u shpreh se nuk do të ketë cënim territorial për Kosovën.
Gjithashtu ai theksoi se Kosova mirëpriti ftesën e SHBA-ve për takimin Kosovë-Beograd, për rifillim të dialogut, në Shtëpinë e Bardhë më 27 qershor.
“Institucionet e Kosovës pas ftesës së SHBA-ve, të presidentit Donald Trump dhe konkretisht ambasadorit Richard Grenell për të vazhduar dialogun në Shtëpinë e Bardhë i janë përgjigjur pozitivisht dhe mirëpresim këtë hap të rëndësishëm, vendimtar dhe shumë të drejtë të SHBA-ve me besim të plotë se me të vërtetë është koha që edhe konkretisht të lëvizim përpara si shtet dhe shoqëri, por edhe për paqen në gjithë rajonin e Ballkanit Perëndimor. E theksoj hapur se asnjë rrethanë nuk pretendohet nga askush në Uashington të cenojë integritetin territorial të vendit dhe i ftojë të gjithë të mos përhapin dezinformata për shkëmbim të territorit”, tha Thaçi.
Duke folur rreth fushatës së Serbisë kundër njohjes së Kosovës, Thaçi deklaroi: “Ne falënderojmë të gjitha shtetet që e kanë njohur Kosovën, Serbia falënderon ndonjë shtet që se ka njohur pavarësinë e Kosovës. Ajo që mund të them është se njohjet ndërkombëtare për Kosovën nuk do të kenë ndalje, mund të ketë pengesa, por nuk mund të ndalet prej askujt”.
