Ukraina ktë të hënë ka rilidhur sërish termocentralin bërthamor të Zaporizhias,i cili u sekuestrua nga forcat ruse, me linjën e jashtme të energjisë pas një ndërprerjeje të shkurtër që e la atë të varur tërësisht nga gjeneratorët.
Gjeneratorët rezervë me naftë u aktivizuan më parë në stacionin, i vendosur në Ukrainën jugore, për të siguruar që karburanti bërthamor të mbahej i ftohtë dhe të parandalonte një fatkeqësi të mundshme.
Secila palë fajësoi tjetrën për përçarjen. Një zyrtar lokal i instaluar nga Rusia tha se Ukraina kishte shkëputur linjën e energjisë elektrike dhe kompania shtetërore e energjisë bërthamore e Ukrainës Energoatom tha se problemi ishte shkaktuar nga bombardimet ruse.
Duke njoftuar se puna e riparimit ka përfunduar, kompania ukrainase Ukrenergo tha: ” Stacioni po ri-energjizohet nga sistemi ukrainas i energjisë elektrike .”
Incidenti kishte alarmuar Rafael Grossin, kreun e Agjencisë Ndërkombëtare të Energjisë Atomike (IAEA), i cili tha se situata e sigurisë bërthamore të centralit ishte “jashtëzakonisht e cenueshme” dhe nënvizoi nevojën për mbrojtje ndërkombëtare.
Megjithëse asnjë nga gjashtë reaktorët e termocentralit nuk prodhon energji elektrike, objektet e tij mbeten të lidhura me sistemin energjetik të Ukrainës dhe konsumojnë energjinë elektrike të prodhuar prej tij për nevojat e tyre, kryesisht për të siguruar ftohjen e reaktorit dhe për të parandaluar një shkrirje të mundshme.
Centrali, i vendosur në një zonë të Ukrainës jugore, të mbajtur nga forcat ruse pranë vijës së frontit përgjatë lumit Dnieper, është termocentrali më i madh bërthamor në Evropë dhe është goditur vazhdimisht nga bombardimet.
Energoatom tha se ishte hera e shtatë që furnizimi me energji elektrike në termocentral ishte ndërprerë që kur Rusia pushtoi Ukrainën në shkurt 2022./abcnews.al
