Një zyrtar izraelit ka akuzuar administratën e Joe Biden se po përpiqet të minojë kryeministrin izraelit Benjamin Netanyahu, pasi SHBA në një raport të saj përmendi “mosbesimin” në aftësinë e tij për të qeverisur.
Raporti i Zyrës së Drejtorit të Inteligjencës Kombëtare tha se “qëndrueshmëria e Netanyahu si lider mund të jetë në rrezik”.
Raporti, i publikuar të hënën, tha gjithashtu se SHBA pret protesta të mëdha që kërkojnë dorëheqjen e Netanyahut dhe zgjedhjet në muajt e ardhshëm në Izrael.
“Ata që zgjedhin kryeministrin e Izraelit janë qytetarët izraelitë dhe askush tjetër. Izraeli nuk është një shtet vasal i SHBA-së, por një vend i pavarur dhe demokratik, qytetarët e të cilit zgjedhin qeverinë”, tha një zyrtar i lartë.
Presidenti Biden javët e fundit ka ashpërsuar retorikën e tij në lidhje me përgjigjen e Izraelit ndaj sulmit të Hamasit të 7 tetorit.
Shtëpia e Bardhë e ka gjetur veten në një pozitë gjithnjë e më të vështirë me numrin në rritje të vdekjeve të civilëve, që tani i kalon 30,000.
“Ne presim që miqtë tanë të marrin masa për të përmbysur regjimin terrorist të Hamasit dhe jo qeverinë e zgjedhur në Izrael”, theksoi ai.
Biden ka kritikuar në mënyrë të përsëritur qasjen e ashpër të Izraelit, duke e quajtur atë “të tepruar” dhe duke bërë thirrje për një armëpushim për të ndihmuar civilët.
Përçarja mes të dyve ka nxitur pikëpyetje nëse Biden mund të shkurtojë ndihmën ushtarake nëse Izraeli fillon një sulm tokësor në Gaza.
Biden fillimisht mbajti anën e Netanyahut si mbështetësin e tij më të fortë, duke mbështetur qëllimet e tij të luftës për të shkatërruar Hamasin dhe duke argumentuar se një armëpushim thjesht do t’i jepte organizatës palestineze një shans për t’u riarmatosur dhe riorganizuar.
Por me liderët e tjerë botërorë që kanë mbajtur një qëndrim më të ashpër kundër Izraelit, Biden ka vënë re që administrata e tij është revoltuar.
/abcnews.al
