Një tjetër sulm agresiv i ushtrisë ruse ka sjellë pasoja tragjike në Ukrainë. Sipas kryebashkiakut të Luhansk, pas një sulmi ajror mbi qytetin e Kreminna, u vranë 56 të moshuar të cilët ndodheshin në një azil pleqsh.
Serhii Haidai tha se sulmi ndodhi nëntë ditë më parë, më 11 mars, dhe se pesëmbëdhjetë banorë të tjerë të shtëpisë së kujdesit ishin rrëmbyer dhe dërguar në qytetin Svatove në atë që tani është territor i pushtuar nga Rusia.
Haidai fillimisht raportoi sulmin në një deklaratë video të postuar në Tëitter më 12 mars, por tha në atë kohë se ai nuk kishte informacion për viktima, duke treguar se shërbimet e urgjencës ukrainase dhe zyrtarët ishin sulmuar kur ata u përpoqën të hynin në zonë.
“Forcat ruse hapën zjarr mbi një shtëpi pleqsh për të moshuarit me një tank. Aty jetonin vetëm të moshuar, shumë prej tyre me aftësi të kufizuara. Nuk e kemi idenë se sa njerëz kanë vdekur dhe sa kanë shpëtuar. Kur u përpoqëm të arrinim në vendin e ngjarjes, ata filluan të na granatojnë”, tha ai më 12 mars.
Në deklaratën e tij të postuar të dielën në Telegram, Haidai tha se ende nuk ishte e mundur të arrinte në vendin e sulmit.
CNN nuk ka qenë në gjendje të verifikojë në mënyrë të pavarur pretendimin.
/Abcnews.al/
