Të mërkurën në mbrëmje, Interi përballet kundër Borussia Dortmund, sfidë e vlefshme për grupin F në Champions League. Zikaltërit do të synojnë fitoren në fushën e tyre, përballë një rivali direkt për kualifikim. Kjo sfidë është shumë e rëndësishme për të dyja skuadrat dhe kështu mendon edhe mbrojtësi i Dortmundit, Manuel Akanji.
Talenti i mbrojtjes verdhezi ka folur para sfidës ndaj zikaltërve, duke thënë: “Interin e kemi studiuar, dhe unë personalisht i kam ndjekur në disa ndeshje. Janë shumë të fortë në mbrojtje, ekip agresiv dhe që i thyen shpejt aksionet e kundërshtarëve.
Kjo është një nga pikat e tyre më të forta. Edhe në sulm, lojtarët kanë treguar se dinë të shënojnë. Do të jetë një transfertë e vështirë për ne, por vijmë me besim në këtë sfidë”, përfundoi Akanji. Dortmundi mposhti M’Gladbach në fundjavë me rezultatin 1-0, ndërsa Interi triumfoi përballë Sassuolos me rezultatin 3-4./abcnews.al
