Gjatë konferencës së përbashkët për shtyp me homologun e tij shqiptar Ruçi, kryetari i parlamentit të Maqedonisë është nervozuar me përkthyesen, duke i kërkuar asaj që të përkthente nga gjuha maqedonase në shqip.
Një moment pakujdesie e përkthyeses e ka nervozuar kryetarin e Kuvendit të Maqedonisë Talat Xhaferi, në momentin që po i drejtohej mediave bashkë me kolegun e tij shqiptar Gramoz Ruçi. Kryeparlamentarit Xhaferi i është dashur të tërheqë vëmendjen e saj disa herë duke i rënë foltores.
Por dhe kur ka filluar të përkthejë, përkthyesja po fliste maqedonisht. Sërish Xhaferri i ka kërkuar që të përkthejë në Shqip për Ruçin atë që ai sapo kishte thënë në gjuhën maqedonase. Momenti ka shkaktuar të qeshura në sallën e konferencës për shtyp ku dhe kryeparlamentari maqedonas është munduar të buzëqeshë./abcnews.al
