Në emisionin “Bardh a Zi” në ABC me Erion Kriston dhe Ornela Gaçen është duke u diskutuar paketa fiskale e propozuar nga qeveria. Ndër të tjera mes të ftuarve në studio u diskutua edhe rreth taksës që parashikohet të aplikohet tek qumështi pluhur që futet nëpërmjet importit në vend.
Deputetja e Partisë Socialiste Blerina Gjylameti u shpreh se taksa 100 lekë për litër synohet të vendoset për të nxitur prodhimin e qumështit të freskët.
“Ka debat në pjesën e deklarimit të qumështit pluhur. Vendosja e kësaj takse nxit prodhuesit vendas për të vijuar me rritjen e prodhimit vendas. Kërkesa nga prodhuesit e qumështi, ishte që do të na dëmtoni dhe do të rritet kosot. Për sa kohë në etiketa, kemi një përqindje shumë të ulët pluhur, për sa kohë nuk figuron një shkrim i tillë për çfarë do t’u rritet kostoja?”
Po ashtu, Gjylameti bëri të ditur se Ministria e Bujqësisë ka një fond të posaçëm për AKU-në që të rrisë kapacitetin e laboratorëve për të kuptuar vërtetësinë e etiketave, në krahasim me cilësinë.
Por, Nikolin Jaka u shpreh se më këtë çështje është duke u abuzuar.
“Sipas ligjit, qumështi, kosi, djathi kaçkavall, gjiza të ndalon ligji të përdorësh qumësht pluhur, po abuzojnë deputetë e opinionistë. Nuk dinë të vërtetë, qumështi pluhur lejohet për t’u përdorur në industrinë e prodhimit të qumështit për foshnje në ushqim për foshnje, në industrinë e prodhimit të ëmbëlsirave, pijeve me bazë qumështi, industrinë e prodhimit të çokollatës, akullores… të shprehet në etiketë sasia e përdorimit që përdoret. Nuk lejohet të përzihet qumështi pluhur me qumështin masiv. Ministria e financave nuk i vendos asnjë taksë produkteve që janë me bazë qumështin pluhur. Ku është sensi këtu?” /abcnews.al/
