Hungaria, pavarësisht se ka marrë presidencën e radhës të Këshillit të Bashkimit Evropian për gjashtë muaj, nuk ka mandat të angazhohet me Rusinë në emër të BE-së, tha të enjten Presidenti i Këshillit Evropian Charles Michel.
Në një postim në platformën X, Michel shkruan se “Këshilli Evropian është i qartë: Rusia është agresori dhe Ukraina është viktima. Asnjë diskutim për Ukrainën nuk mund të bëhet pa Ukrainën”.
Komentet e Michel erdhën pas raportimeve se kryeministri hungarez Viktor Orban do të vizitojë Moskën më 5 korrik dhe do të takohet me presidentin rus Vladimir Putin.
Nga ana tjetër udhëheqësi hungarez theksoi se “paqja është e rëndësishme për të gjitha vendet” në Evropë, duke u zotuar për kontributin e vendit të tij në zgjidhjen e konfliktit ukrainas.
Ai theksoi se Hungaria do të vazhdojë të ofrojë ndihmë për refugjatët ukrainas dhe është e gatshme të kontribuojë në modernizimin e ekonomisë ukrainase.
/abcnews.al
