Ministri i Punëve të Brendshme, Xhelal Sveçla dhe drejtori i Policisë, Samedin Mehmeti kanë lënë sallën e mbledhjes para Komisionit Parlamentar për siguri dhe çështje te mbrojtjes. Kjo pasi në Komision ata janë ftuar që të raportojnë ndaras dhe jo bashkë.
Kështu tha kryetari i Komisionit, Bekë Berisha, i cili pohoi se i ka ftuar ndaras në raportim dhe jo bashkë. Kjo është kundërshtuar nga ministri dhe drejtori i Policisë.
Mbledhjen e kanë braktisur edhe një pjesë e deputetëve të VV-së, që janë anëtarë të këtij Komisioni.
“Ftesën që e kemi marrë ne, ka qenë vetëm ti në ora 10:00”, i ka thënë deputeti i PDK-së Elmi Reçica ministrit Sveçla, ndërsa ky i është përgjigjur se e ka marrë ekipin pasi që punon me ta.
“Ti ke bërë gabime të mëdha, nuk je i zoti të përgjigjesh pa e pasur atë aty”, tha kryetari i Komisionit, Bekë Berisha.
Berisha shtoi se ka pasur pyetje për ministrin, e që sipas tij, ai nuk do të guxonte të përgjigjej.
“Kjo mbledhje është thirrë për situatën në veri. Unë kam pyetje për ministrin qe nuk guxon me u përgjigj. Fatmir po i lexoj pyetjet, pse me barazu njësinë speciale me strukturat e Serbisë? A e din që zëvendësimi i policisë me KFOR-it është kthim i rezolutës 1244. Pranimi i targave KM është hapi i parë drejt Zajednicës. Kom pas plot pyetje edhe për drejtorin e policisë”, ka thënë ai.
