Loading ...
Aeroporti ndërkombëtar King Khalid në kryeqytetin e Arabisë Saudite, Riad, është evakuuar sot pas raportimeve për një shpërthim të fuqishëm. Sipas agjencive ndërkombëtare të lajmeve, dyshohet se aeroporti është sulmuar sërish, vetëm pak ditë pas sulmeve të pretenduara nga rebelët Huthi të Jemenit.
Sipas Reuters, një dëshmitar ka parë më shumë se dhjetë ambulanca që po drejtoheshin me shpejtësi drejt aeroportit. Autoritetet saudite nuk kanë dhënë ende një deklaratë zyrtare për ngjarjen, ndërsa aeroporti u ka kërkuar udhëtarëve të kontaktojnë kompanitë ajrore përpara se të nisen drejt tij.
Ngjarja vjen një ditë pasi autoritetet saudite njoftuan se tre shtetas të vendit, mes tyre një pilot, humbën jetën në dy sulme të kryera një ditë më parë. Gjithashtu, më 6 dhe 7 tetor, tre persona të tjerë u vranë në sulme të rebelëve Huthi ndaj dy aeroporteve saudite.
Sulmet ndodhin në një periudhë të përshkallëzimit të luftimeve mes forcave qeveritare të Jemenit, të mbështetura nga Arabia Saudite, dhe rebelëve Huthi, të cilët kontrollojnë pjesën më të madhe të veriperëndimit të vendit.
Huthitë, të mbështetur nga Irani, thonë se sulmet ndaj Arabisë Saudite janë përgjigje ndaj mbështetjes që Riadi i jep qeverisë jemenase në luftën civile. Konflikti është përkeqësuar pas ofensivës së rebelëve, të cilët morën nën kontroll zona të rëndësishme të bregdetit të Detit të Kuq.
Mes zonave strategjike të prekura është edhe porti i Mokhas, pranë ngushticës Bab al-Mandab, një pikë kyçe për transportin detar ndërkombëtar. Kjo ngushticë lidh Detin e Kuq me Gjirin e Adenit dhe është një nga korridoret më të rëndësishme për tregtinë globale. Forcat jemenase në mbështetje të qeverisë kanë deklaruar se kanë vendosur nën kontroll këtë kalim detar.
Arabia Saudite krijoi një koalicion ushtarak në vitin 2015, me pjesëmarrjen e disa vendeve arabe, për të ndaluar marrjen e pushtetit nga Huthitë dhe për të mbështetur qeverinë e njohur ndërkombëtarisht të Jemenit.
Në vitin 2022, palët arritën një armëpushim të përkohshëm pas vitesh bombardimesh dhe luftimesh tokësore, të cilat, sipas vlerësimeve, shkaktuan qindra mijëra viktima dhe një nga krizat më të rënda humanitare në botë. Megjithatë, armëpushimi jozyrtar nisi të dobësohej në korrik.
Huthitë shpallën një “bllokadë detare” ndaj Arabisë Saudite dhe nisën sulme me raketa dhe dronë kundër aeroporteve, objekteve të naftës dhe anijeve cisternë saudite në Detin e Kuq. Ata pretendojnë se këto veprime janë kundërpërgjigje ndaj asaj që e cilësojnë si bllokadë shumëvjeçare nga Arabia Saudite dhe ndaj një sulmi ajror në aeroportin e Sanaas, kryeqytetit të Jemenit.
