Kryeministri i Izraelit, Benjamin Netanyahu akuzon Lëvizjen e Xhihadit Islamik për bombardimin e një spitali në Gaza që vrau qindra njerëz, 500 deri në 800 sipas raporteve.
“Një analizë e sistemeve operacionale të IDF-së tregon se një breshëri raketash u hodhën nga terroristët në Gaza, pranë spitalit Al Ahli në Gaza në kohën kur u godit. Informacionet nga burime të shumta në duart tona tregojnë se Lëvizja e Xhihadit Islamik është përgjegjëse për lëshimin e dështuar të raketës që goditi spitalin në Gaza”, shkroi Netanyahu në Platformën X.
Talya Lankri, një oficer i lartë rezervë dhe ish nënkryetar i Këshillit të Sigurisë Kombëtare, tha gjithashtu për lajmet e Channel 12 se “IDF nuk godet spitalet”.
Xhihadi Islamik Palestinez u themelua në vitin 1981 nga anëtarë të Vëllazërisë Myslimane të Egjiptit dhe konsiderohet një degë e saj. Në teori, ideologjia dhe qëllimet e Xhihadit Islamik Palestinez dhe Hamasit janë pothuajse identike. Strukturisht, megjithatë, organizatat janë shumë të ndryshme: Xhihadi Islamik është një milici më e vogël e përkushtuar ndaj luftës së armatosur, ndërsa Hamasi është një organizatë shumë më e madhe që qeveris Gazën.
