Një sulm ajror izraelit në një shkollë qendrore të Gazës që përdoret si strehë për palestinezët e zhvendosur ka vrarë 18 persona, ka thënë agjencia e mbrojtjes civile e territorit të Hamasit, ndërsa OKB raportoi se gjashtë nga stafi i saj ishin në mesin e të vdekurve.
Agjencia palestineze e OKB-së për refugjatët, UNRWA, tha se sulmi ishte numri më i lartë i të vdekurve në mesin e stafit të saj në një incident të vetëm. Dy sulme ajrore goditën shkollën dhe rrethinat e saj në Nuseirat.
“Midis të vrarëve ishte menaxheri i strehës Unrwa dhe anëtarë të tjerë të ekipit që ofronin ndihmë për njerëzit e zhvendosur,” tha agjencia e OKB-së në X.
Më herët, ushtria izraelite tha se forcat e saj ajrore kishin “kryer një sulm të saktë ndaj terroristëve që po vepronin brenda një qendre komandimi dhe kontrolli të Hamasit “në terrenin e shkollës, pa dhënë detaje mbi rezultatin ose identitetin e atyre që ishin në shënjestër.
Zyra e mediave qeveritare e Hamasit tha se rreth 5,000 njerëz të zhvendosur ishin strehuar në shkollë kur ajo u godit të mërkurën. Unrwa tha në deklaratën e saj: “Kjo shkollë është goditur pesë herë që nga fillimi i luftës. Ajo është shtëpia e rreth 12,000 njerëzve të zhvendosur, kryesisht gra dhe fëmijë.”
Sekretari i Përgjithshëm i OKB-së, António Guterres tha vonë të mërkurën se “ajo që po ndodh në Gaza është krejtësisht e papranueshme”./abcnews.al
