Loading ...
Pas sulmeve që nisën ditën e djeshme, duke shkaktuar rreth 100 viktima dhe mbi 200 të plagosur, më në fund është arritur një marrëveshje për armëpushim në Nagorno-Karabakh.
Armenët ranë dakord me kërkesën e Azerbajxhanit për të ndaluar luftimin dhe çarmatosjen. Sipas të njëjtave informacione, armenët e enklavës do të takohen me autoritetet azere më 21 shtator.
Një ish-zyrtar i lartë i administratës armene të enklavës separatiste të Azerbajxhanit të Nagorno-Karabakh njoftoi më herët se rreth 100 njerëz kishin vdekur dhe qindra u plagosën në atë që ai e përshkroi si një “luftë të madhe” të nisur nga Azerbajxhani në rajon ditën e djeshme.
“Kjo është një luftë e madhe, Azerbajxhani ka filluar një operacion të plotë,” tha Ruben Vardanyan, ish-kreu i qeverisë së rajonit separatist.
Ndërkohë, autoritetet separatiste armene të Nagorno-Karabakh organizuan sot një seancë urgjente të Këshillit të Sigurimit të rajonit separatist.
Në këtë takim, përfaqësuesit e autoriteteve armene shprehën keqardhjen e tyre që “përgjigja e komunitetit ndërkombëtar ndaj situatës ishte e pamjaftueshme, me mungesë veprimesh konkrete”, thuhet në një deklaratë të postuar në X nga Ministria e Punëve të Jashtme të autoriteteve separatiste.
/abcnews.al
