Studentët e mjekësisë së përgjithshme në universitetin publik nuk i ka kënaqur ulja e viteve të punës së detyruar në Shqipëri pas diplomimit.
Qeveria ndryshoi ligjin pas vendimit të Gjykatës Kushtetuese dhe reduktoi afatet e punësimit nga pesë në tre për studentët e vitit të parë, nga tre në dy vjet për ata të vitit të dytë deri në të katërt dhe për studentët e vitit të pestë dhe të gjashtë në 1 vit, por mjekët e ardhshëm thonë synimi i tyre ishte heqja e këtij detyrimi.
“Nuk është se jemi shumë optimistë dhe nga kjo. Nuk ishim që në fillim pro këtyre viteve, dhe as uljes së viteve, heqja ishte synimi ynë”
“Për ne fitore do të ishte nëse do të dialogonim. Fitore do të ishte nëse nuk do të detyroheshim të punonim këtu, por të nxiteshim të punonim këtu. Kështu që mendoj se është një fitore e vogël dhe duhet më tepër diskutim.”
“Më duket pak a shumë si ishte thjeshtë ka ndryshuar kohëzgjatja me nga një vit mesa e pashë. Mua personalisht nuk është se më shqetëson se unë kam zgjedhur të rri në Shqipëri po në fakt për studentët që kanë qenë goxha të angazhuar me këtë çëshje për mendimin tim nuk është se ka ndryshuar shumë gjë nga ajo që ishte.”
Studentë të mjekësisë së përgjithshme që kundërshtuan projektligjin me protesta përmes një deklarate të shpërndarë në media shprehin keqardhjen për injorimin për të dytën herë në hartimin e tij.
Drafti i hedhur për konsultim publik sipas tyre nuk plotëson boshllëkun ligjor për kriteret e punësimit dhe se po konsultohen me ekipin ligjor për hapat e nevojshëm gjyqësor.
“Projektligji na duket i gabuar, megjithkëtë ne do ta diskutojmë dhe me avokatin, me shumë mundësi do ta vazhdojmë si betejë.”
“E njejta gjë është, thjeshtë formulim ndryshe, dakord s’jemi po ca të themi, fitorja nuk është absolute, shteti ka ato kompetencat e veta”
Projektligji i ndryshuar parashikon punësimin e mjekut të ri në një prej institucioneve shëndetësore publike ku ka nevojë brenda tre muajve nga përfundimi i universitetit.
Kur punësimi nuk realizohet për arsye që nuk varen nga mjeku deri në krijimin e mundësisë për punësim ai duhet të paguhet me 80% të pagës së mjekut të përgjithshëm për nëntë muaj.
Në mbyllje të konsultimit publik në fund të majit ky draft do t’i kalojë për shqyrtim komisioneve parlamentare./abcnews.al
