Ukraina duhet të mbizotërojë si një komb sovran dhe i pavarur në Europë dhe është në interesin e të gjithëve ta mbështesin atë, tha Sekretari i Përgjithshëm i NATO-s, Jens Stoltenberg.
Duke mbërritur në Këshillin e Ministrave të Mbrojtjes të BE-së në Bruksel, ai vuri në dukje se Vladimir Putin nuk mund të fitojë.
I pyetur nëse disa nga aleatët e Ukrainës do të donin të fillonin bisedimet me rusët, Jens Stoltenberg u përgjigj se i takon Ukrainës të vendosë se cilat janë kushtet e pranueshme për negociata dhe më e rëndësishmja cilat janë kushtet e pranueshme për çdo marrëveshje.
“Përgjegjësia e aleatëve të NATO-s është të mbështesin Ukrainën për të mbrojtur veten, sepse kjo është gjithashtu në interesin tonë për të treguar se ne mbrojmë sundimin e ligjit dhe të drejtën ndërkombëtare”, shtoi ai, duke theksuar se “luftërat janë të paparashikueshme. Askush nuk mund të thotë se si dhe kur do të përfundojë kjo luftë”.
“Ajo që mund të themi është se gjasat për një rezultat të pranueshëm nga negociatat rritin më shumë mbështetjen ushtarake që duhet t’i jepet Ukrainës, sepse deri më tani nuk kemi parë një gatishmëri reale nga Presidenti Putin për të negociuar një zgjidhje të pranueshme për Ukrainën.
Pra, e vetmja mënyrë për ta bërë këtë është të bindësh Presidentin Putin se ai nuk do të fitojë në fushën e betejës.
Dhe e vetmja mënyrë për ta arritur këtë është duke forcuar aftësinë ushtarake të Ukrainës, duke ofruar mbështetje,” theksoi ai.
/abcnews.al
