“Duart e Ukrainës janë të lidhura për shkak të kufizimeve të vendosura ndaj saj në lidhje me përdorimin e armëve perëndimore në tokën ruse,” tha sot Sekretari i Përgjithshëm i NATO-s, Jens Stoltenberg.
Shumë vende që furnizojnë me armë Ukrainën e kanë lejuar t’i përdorë ato vetëm në tokën e saj, duke përfshirë Krimenë, të cilën Moska e aneksoi në 2014 dhe Donbass, duke e ndaluar të godasë objektivat në tokën ruse.
“Unë mendoj se ka ardhur koha për të rishikuar disa nga këto kufizime,” tha vonë Stoltenberg gazetarëve në margjinat e asamblesë parlamentare të NATO-s.
Kievi “ka të drejtë të mbrohet” dhe rrjedhimisht “të drejtën për të goditur objektiva legjitime, ushtarake jashtë Ukrainës”, këmbënguli ai.
Sekretari i përgjithshëm i NATO-s ka bërë thirrje më parë për heqjen e kufizimeve perëndimore.
Por, siç nënvizoi ai sot, vendimin do ta marrin aleatët. Disa nuk kanë vendosur kufizime, por të tjerët kanë vendosur, shtoi ai, pa elaboruar.
SHBA, një furnizues kryesor i ndihmës ushtarake për Ukrainën, dhe disa vende europiane, si Gjermania, duken të kujdesshme për t’i ofruar armë Kievit pa asnjë kufizim.
Megjithatë, gjatë vizitës së tij në Kiev më 15 maj, sekretari amerikan i shtetit Anthony Blinken vlerësoi se vendimin përfundimtar për përdorimin e armëve që do të marrë do ta marrë Ukraina.
“Ne nuk kemi inkurajuar sulme jashtë Ukrainës, por në fund të fundit është Ukraina ajo që do të marrë vendimet e veta për mënyrën se si do ta zhvillojë këtë luftë”, tha Blinken.
Rusia ka paralajmëruar vazhdimisht Perëndimin kundër çdo sulmi në tokën e saj me armë perëndimore.
/abcnews.al
