Stoltenberg: Hungaria pritet të ratifikojë anëtarësimin e Suedisë në fund të shkurtit

Sekretari i Përgjithshëm i NATO-s, Jens Stoltenberg tha sot se pret që parlamenti i Hungarisë të ratifikojë anëtarësimin e Suedisë kur të mblidhet në fund të shkurtit, duke hequr pengesën përfundimtare për pranimin e vendit nordik në aleancën ushtarake perëndimore.

Hungaria është bërë vendi i fundit anëtar i NATO-s që ende nuk i ka dhënë dritën jeshile ligjore pranimit të Suedisë pasi parlamenti turk ratifikoi kërkesën e Stokholmit të martën dhe Presidenti Tajip Erdogan nënshkroi ratifikimin dje.

Aplikimi i një vendi për t’u anëtarësuar në NATO duhet të ratifikohet nga të 31 anëtarët e Aleancës përpara se vendi të mund të bashkohet me të. Stoltenberg tha se kryeministri hungarez Viktor Orban e siguroi atë në një bisedë telefonike këtë javë se ai mbështet anëtarësimin e Suedisë.

“Anëtarësimi i Suedisë në NATO do ta bëjë NATO-n më të fortë dhe të gjithë ne më të sigurt”, u tha Stoltenberg gazetarëve në selinë e NATO-s.

“Mesazhi që kam marrë është se parlamenti do të mblidhet sërish në fund të shkurtit, ndaj duhet të presim.

Por unë jam absolutisht i sigurt dhe po llogaris te Hungaria se do të ratifikojë anëtarësimin e Suedisë sapo të mblidhet parlamenti në fund të shkurtit”, përfundoi ai.

/abcnews.al