Starmer: Gati për një afrim më të ngushtë me BE-në ‘në interes kombëtar’

Sir Keir Starmer shprehet se Mbretëria e Bashkuar duhet të lëvizë drejt një afrimi më të ngushtë me tregjet e BE-së “nëse është në interesin tonë kombëtar”.

Kryeministri britanik i tha Laura Kuenssberg për BBC se do të ishte “më mirë të shikonim drejt tregut të vetëm sesa bashkimit doganor për afrimin tonë të mëtejshëm”, në mënyrë që të mbroheshin marrëveshjet tregtare me Indinë dhe SHBA-në.

Por ai përjashtoi rishikimin e premtimeve të manifestit për të mos u ribashkuar me tregun e vetëm ose bashkimin doganor të BE-së, ose për t’i dhënë fund lirisë së lëvizjes. Komentet janë treguesi më i qartë deri më tani se Sir Keir dëshiron të ndjekë një marrëdhënie më të ngushtë me Evropën në një numër më të gjerë fushash, shkruan BBC.

Konservatorët thanë se Kryeministri po përdorte Brexit si justifikim për vështirësitë ekonomike të Mbretërisë së Bashkuar. Mbretëria e Bashkuar tashmë po bashkëpunon me Brukselin për disa rregulla rreth ushqimit dhe bujqësisë për të lejuar qasjen në zonën ekonomike tregtare evropiane të njohur si tregu i vetëm.

Sir Keir i tha Laura Kuenssberg: “Mendoj se duhet të afrohemi, dhe nëse është në interesin tonë kombëtar të kemi një përputhje edhe më të ngushtë me tregun e vetëm, atëherë duhet ta marrim në konsideratë këtë, duhet të shkojmë deri aty.

“Mendoj se është në interesin tonë kombëtar të shkojmë më tej.” Ai shtoi: “Në fakt mendoj se tani që kemi bërë marrëveshje me SHBA-në, të cilat janë në interesin tonë kombëtar, tani që kemi bërë marrëveshje me Indinë që janë në interesin tonë kombëtar, po shikojmë më mirë drejt tregut të vetëm sesa drejt bashkimit doganor për përputhjen tonë të mëtejshme. Dhe nuk do të ishte në interesin tonë tani të dorëzoheshim.”/abcnews.al