Loading ...
Kompania hapësinore e Elon Musk, SpaceX, ka njoftuar një projekt gjigant në Luiziana të SHBA-së, ku planifikon të ndërtojë bazën e saj më të madhe të lëshimit deri më tani.
Projekti, i quajtur “Starbase, Louisiana”, pritet të kushtojë rreth 100 miliardë dollarë dhe ndërtimi i tij është planifikuar të nisë vitin e ardhshëm. Objekti do të shtrihet në një sipërfaqe prej rreth 125 mijë akrash, ose 50 585 hektarësh.
Sipas SpaceX, baza e re do të ketë një rol kyç në planet e kompanisë për programin Starship, duke mbështetur mijëra fluturime çdo vit drejt orbitës së Tokës, Hënës, Marsit dhe destinacioneve të tjera në hapësirë.
Kompania synon që fluturimi i parë i Starship nga baza e re në Luiziana të realizohet në vitin 2029.
Projekti pritet të ketë ndikim të madh edhe në ekonominë lokale. SpaceX deklaron se baza do të krijojë më shumë se 3 mijë vende pune direkte, ndërsa autoritetet e Luizianës vlerësojnë se do të krijohen edhe mbi 8 100 vende pune në mënyrë indirekte.
Agjencia e Zhvillimit Ekonomik të Luizianës tha se paga mesatare e punonjësve në këtë kompleks do të jetë rreth 192% më e lartë se paga mesatare aktuale në rajon.
“Ky projekt historik do ta pozicionojë Luizianën si një qendër globale për industrinë hapësinore të gjeneratës së ardhshme”, deklaroi agjencia.
Baza e re do të mbajë të njëjtin emër, Starbase, si objekti i SpaceX në jug të Teksasit. Në vitin 2025, banorët e zonës së Cameron County miratuan krijimin e qytetit të Starbase, ku kompania zhvillon dhe teston teknologjitë e saj hapësinore.
Projekti i Luizianës vjen në një moment kur Elon Musk po zgjeron ndjeshëm ambiciet e SpaceX. Përveç misioneve drejt Marsit, kompania po punon edhe për zhvillimin e teknologjive të inteligjencës artificiale dhe vendosjen e qendrave të të dhënave në hapësirë.
Ndërkohë, SpaceX dhe Tesla kanë njoftuar gjithashtu një investim prej 16.8 miliardë dollarësh në Teksas për ndërtimin e një kompleksi të prodhimit të çipave të inteligjencës artificiale, të quajtur Terafab.
Zgjerimi i kompanisë po ndodh paralelisht me përpjekjet për të bindur investitorët se SpaceX mund të jetë një kompani fitimprurëse në një periudhë afatgjatë.
Pas debutimit në bursën teknologjike Nasdaq, aksionet e SpaceX kanë humbur më shumë se 30% nga nivelet e tyre më të larta, megjithëse vazhdojnë të tregtohen mbi çmimin fillestar prej 135 dollarësh për aksion.
Me bazën e re në Luiziana, SpaceX synon të rrisë ndjeshëm kapacitetin e saj të lëshimeve dhe të krijojë infrastrukturën për një epokë të re të udhëtimeve hapësinore.
