Partizani nuk gjen qetësi. Seanca e djeshme stërvitore nuk ka shkuar si duhet, për shkak se trajneri Adolfo Sormani është nervozuar dhe e ka braktisur seancën. Ky është artikulli kryesor i “Panorama Sport”, që është hapur me titullin: “Tension te Partizani, Sormani braktis stërvitjen”.
Gazeta e përditshme sportive ka veçuar edhe lajme të tjera që lidhen me Partizanin, konkretisht zëra merkatoje. Michael Ngoo, sulmuesi shtatlartë i Tiranës, shikohet sërish si opsion për sulmin e të kuqve.
Anglezi mund të largohet nga Tirana, pasi kontrata i përfundon në mbyllje të kampionatit. Në kampin bardheblu kanë nisur prej kohësh të gjejnë një tjetër lojtar për sulmin dhe e ardhmja e Ngoo duket larg 24 herë kampionëve të vendit.
Te Partizani duan edhe një mbrojtës qendre, madje që të luajë me këmbën e majtë. Deian Boldor nuk është se ka bindur plotësisht këtë sezon dhe Renato Arapi është lojtari që në kampin kryeqytetas e duan sërish. Edhe verën e shkuar e donin, por mbrojtësi zgjodhi të luante për Teutën, skuadrën e vendlindjes. / abcnews.al
