Manchester United pësoi një zhgënjim në mesjavë. Humbja 3-2 në fushën e Leipzig solli eliminimin nga Champions League, teksa djemtë e Ole Gunnar Solskjaer do të vazhdojnë aventurën europiane në Europa League.
Fokusi është te sfida e nesërme ndaj Manchester City. Në “Old Trafford” do të luhet një nga derbet më të forta të Premier League, takim që nis në orën 18:30. “Djajtë e Kuq” kanë fituar katër ndeshjet e fundit në kampionat dhe janë 5 pikë larg kreut.
Solskjaer analizon derbin ndaj ekipit të Pep Guardiolës në konferencën e zakonshme për shtypin, duke karikuar djemtë e tij. “Duhet ta nisim mirë ndeshjen. Kohët e fundit kemi bërë shumë mirë në derbi, kështu që do zbresim në fushë me objektivin për ta zhbllokuar sa më shpejt ndeshjen.
Humbja me Leipzig na ka zhgënjyer, por e kemi treguar se dimë të reagojmë mirë pas humbjeve. E ndjej që po përmirësohemi dhe po i afrohemi nivelit që duhet të ketë Manchester United. Kemi sulmues të shpejtë dhe dinamikë.
Ky ekip ka lojtarë me kualitet të mirë që mund të krijojnë magji në fushë. Njerëzit thonë se nuk kemi ekuilibër si skuadër, por harrojnë që kemi fituar katër ndeshjet e fundit në kampionat“, thekson trajneri norvegjez. /abcnews.al
