Manchester United fitoi 0-2 ndaj Everton mbrëmjen e kaluar dhe u kualifikua në gjysmëfinalen e EFL Cup. “Djajtë e Kuq” konfirmohen si një ndër ekipet më të forta në transfertë dhe kjo është hera e dytë që mposhtin Everton jashtë fushe (fituan 1-3 në sfidën e 7 nëntorit në kampionat).
Dy golat e suksesit të mbrëmjes së kaluar erdhën në minutat e fundit. Edinson Cavani zhbllokoi takimin në minutën e 88′, teksa në shtesa erdhi edhe realizimi i francezit Martial. Ole Gunnar Solskjaer analizoi takimin dhe nuk i kurseu elozhet për “El Matador”.
“I nisëm shumë mirë 20-25 minutat e para, u treguam të shkëlqyer dhe duhet të kishim shënuar 2-3 gola. Më pas Evertoni e mori veten dhe pati momente të mira deri në fundin e pjesës së parë.
Më pëlqyen edhe 20 minutat e fundit ta takimit, zhbllokuam takimin me anë të Cavanit, i cili mund të realizonte 3 gola në pjesën e parë. Sidoqoftë, Edinson është një sulmues madhështor dhe realizoi një gol fantastik.
Fitimi i trofeut? E dimë që nëse mbrohemi mirë, i kemi lojtarët për të bërë mirë në sulm dhe për të kontrolluar e fituar ndeshjet. Skuadra po luan me shpirtin e duhur, fitoret po na japin energji dhe po shkojmë me pozitivitet drejt Boxing Day“, thekson Solskjaer. /abcnews.al
