Demian Smith, zëvendës ambasador i Shteteve të Bashkuara në Shqipëri ka mbajtur sot një fjalim në aktivitetin e përfundimit të programit të trajnimit të FBI-së, të grupit të kandidatëve për hetues të BKH-së.
Smith ka ardhur në Shqipëri një javë më parë, dhe siç tregoi vetë, kjo ishte veprimtaria e tij e parë zyrtare jashtë Ambasade. Në fjalimin e tij, ndër të tjera ai u tha kandidatëve për hetues të BKH se pas daljes nga trajnimi, ata do të jenë pjesë e një kapitulli të ri të” institucioneve të pavarura, të besuara, efikase dhe të besueshme të gjyqësorit.”
Sipas numrit dy të Ambasadës Amerikane, ky i sotmi, ishte një hap i rëndësishëm përpara në luftën e Shqipërisë kundër korrupsionit dhe krimit të organizuar.
Smith theksoi se BKH do t’i tregojë Shqipërisë se askush nuk është mbi ligjin dhe se ai zbatohet njësoj për të gjithë.
“Ditët e pandëshkueshmërisë së të pasurve dhe të fuqishmëve kanë mbaruar. Këtë e kërkon populli shqiptar”.
