Reali Madrid është fiksuar për të afruar një sulmues që në muajin janar dhe ai që deri më tani po bën namin është polaku Robert Lewandowski. Një mision i vështirë, duke parë se Bayern Munich nuk mund të heqe dorë nga shërbimet e një prej lojtarëve më të mirë në mes të sezonit.
Gjithsesi raportohet se spanjollët kanë edhe një skenar për t’i bindur gjermanët. Lewandovksi (18 gola në 13 ndeshje sivjet) vlerësohet me rreth 65 milionë euro, por në këtë lëvizje synohet të përfshihet një lojtar tjetër që i ka treguar vlerat në Bundesliga.
Luka Jovic, serbi që në Spanjë nuk po gjen hapësira, mund të ribashkohet me Niko Kovac. Ata kanë punuar së bashku te Eintracht Frankfurt dhe trajneri kroat ia di mirë cilësitë sulmuesit. Vjet ai shënoi 17 gola në kampionatin gjerman dhe Reali e bleu për 60 milionë euro.
Gjithsesi Zidane nuk e ka në planet e tij dhe për Realin është me leverdi nëse ia del të bindë bavarezët për të bërë këtë shkëmbim. Sigurisht për Bayern Munich mund të ketë edhe disa miliona që mund të kalojnë në arkat e klubit. /abcnews.al
