Atletico Madrid fitoi 0-1 në fushën e Elches dhe vijon të kryesojë e vetme kampionatin spanjoll. Goli i Llorentes i dhuroi tre pikë jetike skuadrës “Colchoneros”. Trajneri Diego Simeone foli pas ndeshjes në lidhje me suksesin e ditës së sotme.
“Kemi hyrë në një muaj vendimtar dhe çdo fitore është një hap shumë i rëndësishëm përpara. Zhvilluam një pjesë të parë të shkëlqyer, një nga më të mira të kohëve të fundit, por avantazhi duhet të ishte më i thellë.
Pas një ore lojë hoqëm dorë nga sulmet tona, Elche filloi të qarkullonte topin dhe në minutat e fundit e shtuan shumë presionin ndaj nesh. Gjithsesi, unë jam shumë i kënaqur me mënyrën sesi djemtë zbritën në fushë.
Sot dua të merrem vetëm me aspektet pozitive, të cilat ishin të shumta. Carrasco dhe Hermoso u treguan madhështorë, Savic dhe Gimenez shfaqën në pah forcën e tyre, ndërsa Kondogbia zhvilloi një ndeshje të shkëlqyer.
Mos të harrojmë edhe faktin që Luis Suarez luajti 80 minuta pas rikthimit nga dëmtimi, ai e ndihmoi shumë skuadrën. Duhet të vazhdojmë kështu, duhet të punojmë fort gjatë javës“, deklaroi trajneri argjentinas. /abcnews.al
