Drafti për sigurimin e detyrueshëm të banesave do të jetë gati së shpejti. Gjatë raportimit në kuvend kryetarja e Autoritetit të Mbikqyrjes Financiare, Mimoza Kaçi tha se tarifa që duhet të paguajnë qytetarët do të jetë minimale, ndërsa po diskutohet edhe për përfshirjen e kompanive private.
Zhvillime pozitive ka pasur gjatë vitit të kaluar edhe tregu i pensioneve private .Numri i anëtarëve arriti në 38 mijë duke pësuar një rritje me gati 18% krahasuar me një vit më parë.
Sipas Autoritetit të Mbikqyrjes Financiare brenda këtij viti do të nisë edhe zbatimi i skemës bonus-malus për sigurimin e automjeteve në bazë të historikut të aksidenteve.
Gjatë vitit 2023,është konstatuar zgjidhja me marrëveshje midis drejtuesve të mjeteve e aksidenteve në mbi 37% të rasteve për dëmet me vlerë deri në 30,000 lekë, duke sjellë njëkohësisht edhe reduktim të dokumenteve për praktikat e dëmeve.
