Loading ...
Në Prishtinë është inauguruar një “corner” i ri i gjuhës italiane në një universitet privat, një nismë që synon të forcojë praninë kulturore dhe gjuhësore të Italisë në vend.
Në një intervistë për emisionin Të Gjithë Rrugët të Çojnë në Romë në ABC News, ambasadori i Italisë në Kosovë, Maurizio Antonini, theksoi se që nga tetori 2023 bashkëpunimi me universitetin ka sjellë progres të dukshëm në promovimin e gjuhës dhe kulturës italiane.
Ai nënvizoi se angazhimi italian në Kosovë po intensifikohet përmes aktiviteteve kulturore dhe projekteve të reja, duke synuar rritjen e interesit për italishten dhe zgjerimin e bashkëpunimit në fusha të ndryshme.
Artur Nura: Atëherë, përshëndetje zoti ambasador. Jemi në Prishtinë, në një universitet privat, në të cilin është inauguruar “corner”, këndi i italishtes. Si ndiheni që jeni pjesë e këtij bashkëpunimi?
Maurizio Antonini: Unë mendoj se ne, që nga tetori i vitit 2023, bashkëpunojmë me këtë universitet dhe jemi shumë të kënaqur, sepse kemi parë një progres të vazhdueshëm në promovimin e gjuhës italiane dhe kulturës italiane. Kemi bërë evente këtu, gjithashtu të lidhura me promovimin e kuzhinës italiane në botë, dhe mendoj se ky është vërtet një nga vendet në Kosovë ku italishtja ka më shumë sukses.
Artur Nura: Ndërkohë, nëse kujtojmë ambasadorin tuaj në Tiranë, kolegun tuaj, ai u ka thënë ambasadorëve të Gjermanisë dhe të Francës: “Shikoni zotërinj, kemi realizuar një mbledhje të përbashkët te dy qeverive ne Rome dhe nuk kishte nevojë për përkthim, sepse të gjithë flisnin italisht në Shqipëri”. Ndërsa këtu nuk është e njëjta gjë. Kështu që puna juaj bëhet më e madhe?
Maurizio Antonini: Patjetër. Qëllimi është të përpiqemi të promovojmë gjuhën italiane dhe kulturën italiane dhe ne po e bëjmë këtë me një përkushtim të madh. Duhet të them se në të kaluarën, në lidhje me Shqipërinë, ka pasur më pak vëmendje për promovimin e gjuhës dhe kulturës italiane në Kosovë. Tani jemi vërtet duke u angazhuar shumë në këtë drejtim dhe po realizojmë një sërë eventesh kulturore të nivelit të lartë. Synojmë të intensifikojmë më tej aktivitetin tonë të bashkëpunimit kulturor dhe të promovimit të gjuhës italiane.
Artur Nura: Ka shumë potencial në këtë vend? Ndërkohë, unë kam parë potencial të madh në këtë universitet. Për aq sa e njoh Kosovën, do të thosha se nuk është një shoqëri plotësisht filo-italiane; është një shoqëri ku duhet të punohet më shumë për ta bërë filo-italiane, si në këtë universitet me këtë “corner”. A keni tashmë projekte të tjera për kënde të italishtes në Kosovë?
Maurizio Antonini: Po, unë do të thosha se ka shumë vëmendje dhe shumë interes për kulturën italiane në Kosovë. Për këtë nuk kemi dyshime. Është e vërtetë që në të kaluarën ndoshta nuk është bërë mjaftueshëm, por tani ne po angazhohemi shumë dhe mendoj se ka hapësirë për të forcuar praninë tonë. Sa i përket këndeve të tjera, kemi hapur një në Universitetin e Prizrenit para disa muajsh dhe tani ideja është që të forcojmë aktivitetet e këtyre këndeve italiane, duke promovuar aktivitete të mëtejshme. Këto kënde duhet të jenë të gjalla, prandaj duhet të stimulohet vazhdimisht aktiviteti i universiteteve për sa i përket mësimit të gjuhës italiane.
Artur Nura: Tani një pyetje tjetër, që është ekonomike, por edhe politike. Në Shqipëri tashmë ka më shumë se 1000 fluturime në muaj mes Italisë dhe Shqipërisë. Në Kosovë, për fat të keq, nuk ka kaq shumë. A duhet të punojmë për të tërhequr më shumë vëmendje italiane edhe në këtë drejtim?
Maurizio Antonini: Ndërkohë ka një fluturim për në Milano.
Artur Nura: Vetëm ai është?
Maurizio Antonini: Po, saktësisht. Por në shtator është planifikuar hapja e fluturimit për në Romë. Mendoj se ky është një hap shumë i rëndësishëm. Problemi është se në Itali ende nuk ka një perceptim të qartë se çfarë është Kosova dhe çfarë ofron ajo. Por kjo është edhe puna e ambasadës: të përpiqemi të bëjmë të kuptohet se në këtë vend ka mundësi të mëdha dhe mundësi për të zhvilluar bashkëpunime shumë të rëndësishme në fushën kulturore, tregtare dhe gjuhësore.
Artur Nura: Ndërkohë, unë si gazetar politik që punoj për Radio Radicale dhe mbuloj Marredheniet Italo Shqiptare prej 20 vitesh dhe territoret shqiptare të Ballkanit Perëndimor, shoh në këtë qeverine e Giorgia Melonit një vëmendje të shtuar ndaj Ballkanit. Zëvendëskryeministri juaj këtu ka ardhur dy herë, nëse nuk gaboj, ministri i mbrojtjes gjithashtu, dhe komandanti i KFOR-it eshte Italian herë pas here sipas rregullave të tyre. Këtë duhet ta shfrytëzojmë, apo jo?
Maurizio Antonini: Sigurisht. Siç e dini, kontingjenti italian në KFOR është kontingjenti më i madh kombëtar, rreth 900 ushtarë. Në 14 raste nga 27, komandanti i KFOR-it ka qenë italian. Ka pasur vizita në të kaluarën dhe ne do të donim të shihnim edhe më shumë. Problemi është se Kosova ende nuk ka arritur të kapërcejë plotësisht një krizë të gjatë institucionale dhe politike. E pamë edhe në vitin 2025: për fat të keq, javën e kaluar asambleja nuk arriti të zgjedhë presidentin e ri të Republikës dhe kjo e komplikon mundësinë për një dialog politik më të strukturuar. Shpresojmë që presidenti i ri të zgjidhet sa më shpejt dhe që kjo të lejojë rihapjen e dialogut politik.
Artur Nura: Gjithçka nëpërmjet demokracisë do të zgjidhet, apo jo?
Maurizio Antonini: Absolutisht po. Kosova është një demokraci e vërtetë dhe rezistente. Artur Nura: Sigurisht ka pasur probleme, si edhe në Itali apo në shumë vende të tjera, por shpresojmë që kjo situatë të zgjidhet sa më shpejt.
Maurizio Antonini: Pajtohem plotësisht.
Artur Nura: Ndërkohë, nëse jeni dakord, edhe studentët që janë tashmë të certifikuar ne gjuehn italiane mund të vijnë këtu për të përfunduar intervistën tonë.
