Shtetet e Bashkuara kanë dhënë përgjigjen e tyre zyrtare ndaj kërkesave të Rusisë për krizën në kufirin me Ukrainën. Sekretari i Shtetit Antony Blinken tha se propozimi ofron “një rrugë serioze diplomatike përpara, nëse Rusia e zgjedh atë”. Por ai paralajmëroi se SHBA po vepronte “me fokus të barabartë” për të forcuar mbrojtjen e Ukrainës.
Blinken u kërkoi gjithashtu qytetarëve amerikanë në Ukrainë që të “konsideroni seriozisht” largimin nga vendi, duke i bërë jehonë udhëzimeve të mëparshme. Rusia kishte lëshuar një listë të shkruar të shqetësimeve të saj në lidhje me zgjerimin e aleancës ushtarake të NATO-s dhe çështjet e lidhura me sigurinë. Midis tyre ishte një kërkesë për NATO-n për të përjashtuar mundësinë e anëtarësimit të Ukrainës dhe të tjerëve në aleancë raporton “BBC”.
Rusia në javët e fundit ka grumbulluar një numër të madh trupash në kufirin me Ukrainën, diçka që vendet perëndimore e kanë parë si përgatitje për një pushtim të mundshëm. Rusia ka mohuar pretendimet se ka ndërmënd të pushtojë Ukrainën. Zoti Blinken tha se përgjigja e SHBA-së i bëri të qarta “parimet e saj thelbësore”, duke përfshirë sovranitetin e Ukrainës dhe të drejtën e saj për të zgjedhur të jetë pjesë e aleancave të sigurisë si NATO.
“Nuk duhet të ketë asnjë dyshim për seriozitetin tonë të qëllimit kur bëhet fjalë për diplomacinë dhe ne po veprojmë me fokus dhe forcë të barabartë për të forcuar mbrojtjen e Ukrainës dhe për të përgatitur një përgjigje të shpejtë të bashkuar ndaj agresionit të mëtejshëm rus,” tha ai. Sekretari i Shtetit tha se SHBA-ja kishte dërguar tre dërgesa “ndihme” ushtarake këtë javë, duke përfshirë raketa Javelin dhe armatim anti-blind, së bashku me qindra ton municione dhe pajisje. / abcnews.al
